ગાંધીનગર જિલ્લામાં દારૂબંધીના કડક અમલ વચ્ચે દહેગામ પોલીસને મોટી સફળતા મળી છે. દહેગામ-નરોડા હાઈવે પર બાતમીના આધારે વોચ ગોઠવીને પોલીસ દ્વારા એક હ્યુન્ડાઈ ક્રેટા ગાડીમાંથી વિદેશી દારૂનો મોટો જથ્થો ઝડપી લેવામાં આવ્યો છે. આ કામગીરીમાં પોલીસે કુલ 572 નંગ વિદેશી દારૂની બોટલો સાથે બે રાજસ્થાની શખ્સોની અટકાયત કરી છે.
બાતમીના આધારે ઓપરેશન
ઘટનાની મળતી માહિતી અનુસાર, ગાંધીનગર જિલ્લાની દહેગામ પોલીસને ખાનગી રાહે ચોક્કસ બાતમી મળી હતી કે, એક સફેદ રંગની ક્રેટા ગાડીમાં વિદેશી દારૂનો જથ્થો નરોડા તરફ લઈ જવામાં આવી રહ્યો છે. આ બાતમીને પગલે પોલીસે હાઈવે પર વોચ ગોઠવી હતી. પોલીસને જોઈ બુટલેગરોએ ગાડી ભગાવવાનો પ્રયાસ કર્યો હતો, પરંતુ પોલીસે સતર્કતા દાખવી ફિલ્મી ઢબે પીછો કરીને વડોદરા પાટીયા નજીક આવેલી 'શ્રી રામ વિલેજ હોટલ' ની સામે ગાડીને આંતરી લીધી હતી.
