રાજકોટમાં હિટ એન્ડ રનની ઘટનામાં મહિલાનું મોત થયું છે, પુરપાટ ઝડપે આવતી કારે મહિલાને અડફેટે લીધી છે અને મહિલાને અડફેટે લઇ કારચાલક થયો ફરાર, મહિલાને ગંભીર ઇજા થતા ઘટનાસ્થળે જ મોત થયું છે, ગોંડલ ચોકડી નજીક રોડ ક્રોસ કરતી વખતે કાર ચાલકે મારી ટક્કર અને રાજકોટ પોલીસે ગુનો નોંધી વધુ તપાસ હાથ ધરી છે.

રાજકોટ શહેરમાં વધુ એક હીટ એન્ડ રનનો બનાવ બન્યો છે

ગોંડલ રોડ ચોકડીથી આજી ડેમ ચોકડી વચ્ચે રામાધાણી હોટલ નજીક હાઈવે રોડ ક્રોસ કરતી વેળાએ પુરપાટ કારે ઠોકરે લેતા વૃધ્ધાનું મોત નીપજતાં તેના પરિવારજનોમાં શોક છવાયો છે. પોલીસ સુત્રોના જણાવ્યા મુજબ જુનાગઢ જિલ્લાના માણાવદર ગામ નજીક બાંટવા ગામે રહેતા ઈન્દુબેન પ્રાગજીભાઈ મારૂ (ઉ.વ.૬૩) રાત્રીના ગોંડલ રોડ ચોકડી અને આજીડેમ ચોકડી વચ્ચે રામાધણી હોટલ પાસે પગપાળા રોડક્રોસ કરતા હતા તે દરમિયાન પુરપાટ કારે ઠોકરે લઈ નાસી જતા તેને ગંભીર હાલતમાં ૧૦૮ દ્વારા સારવાર માટે સિવિલ હોસ્પિટલમાં ખસેડાયા હતા જેનું ટુંકી સારવાર દરમિયાન મોત નીપજયુ હતુ.

અકસ્માત બાદ નાસી છુટેલા કાર ચાલક સામે ગુનો નોંધવાની કાર્યવાહી કરી

બનાવની જાણ થતા આજી ડેમ પોલીસ મથકના હેમંતભાઈ ધરજીયા સહિતના સ્ટાફે તપાસ કરતા મૃતક વૃધ્ધા તેના પતિ સાથે રાજકોટમાં ગોંડલ રોડ ચોકડીથી આજીડેમ ચોકડી વચ્ચે આવેલ જયોતીપાર્કમાં રહેતી તેની પુત્રીના ઘેર જતા હતા તે દરમિયાન આ બનાવ બન્યો હોવાનું પરિવારજનોએ જણાવતા પોલીસે અકસ્માત બાદ નાસી છુટેલા કાર ચાલક સામે ગુનો નોંધવાની કાર્યવાહી કરી છે.

હિટ એન્ડ રન કાયદો શું છે

હિટ એન્ડ રન પર કરવામાં આવેલી આ નવી જોગવાઇ છે. આ અંતર્ગત રોડ પર હિટ એન્ડ રનની ઘટના બને તો વાહન ચાલકને 10 વર્ષની સજા થશે. આ ઉપરાંત તેને દંડ પણ ભરવો પડશે. હવે નવા નિયમ મુજબ જો કોઈ કાર સાથે ટકરાય અને પોલીસ પ્રશાસનને જાણ કર્યા વગર જ ડ્રાઈવર ઘટના સ્થળેથી ફરાર થઈ જાય તો તેને 10 વર્ષ સુધીની સજા થશે અને દંડ પણ ફટકારવામાં આવશે.

આ પણ વાંચો : Weather News : ગુજરાતમાં પૂર્વ તરફના પવન ફૂંકાતા વધ્યો ઠંડીનો ચમકારો