હીરા અને ટેક્સટાઇલ સિટી સુરતમાં ગુનાખોરી ડામવા માટે પોલીસ એક્શન મોડમાં છે. સુરતના સારોલી પોલીસ સ્ટેશનની ટીમે પેટ્રોલિંગ દરમિયાન મળેલી ચોક્કસ બાતમીના આધારે ઓપરેશન પાર પાડીને દેશી પિસ્તોલ સાથે બે શખ્સોને દબોચી લીધા છે. પકડાયેલા શખ્સો પાસેથી હથિયાર મળી આવતા પોલીસે વધુ તપાસ તેજ કરી છે.
કાર્યવાહીની વિગતો
સારોલી પોલીસની ટીમ વિસ્તારમાં પેટ્રોલિંગમાં હતી, ત્યારે શંકાસ્પદ હાલતમાં જણાતા બે શખ્સોની અટકાયત કરવામાં આવી હતી. તેમની ઝડતી લેવામાં આવતા તેમની પાસેથી એક દેશી બનાવટની પિસ્તોલ મળી આવી હતી. પોલીસે હથિયાર ઉપરાંત મોબાઈલ ફોન સહિત કુલ રૂપિયા 20,000નો મુદ્દામાલ જપ્ત કર્યો છે.
પોલીસ તપાસ
પોલીસે બંને આરોપીઓ વિરૂદ્ધ આર્મ્સ એક્ટની વિવિધ કલમો હેઠળ ગુનો નોંધી તેમની ધરપકડ કરી છે. આ હથિયાર તેઓ ક્યાંથી લાવ્યા હતા? અને સુરતમાં કઈ મોટી ઘટનાને અંજામ આપવાના હતા? તે દિશામાં પોલીસે તપાસનો ધમધમાટ શરૂ કર્યો છે. પ્રાથમિક પૂછપરછમાં અન્ય કોઈ ગેંગ કે ગુનેગારોના નામ બહાર આવે તેવી શક્યતા છે. સારોલી પોલીસની આ સફળ કામગીરીથી અસામાજિક તત્વોમાં ફફડાટ ફેલાઈ ગયો છે. પોલીસે શહેરીજનોને અપીલ કરી છે કે, કોઈપણ શંકાસ્પદ પ્રવૃત્તિ જણાય તો તુરંત પોલીસનો સંપર્ક કરવો.
આ પણ વાંચો - Surat: CM ભૂપેન્દ્ર પટેલે 'સ્વામી વિવેકાનંદ રાષ્ટ્રીય પુસ્તક મેળો' અને ફ્લાવર શોને ખુલ્લો મૂક્યો
