સાઈબર માફિયાઓએ રાજ્યના પૂર્વ મંત્રી અને વડોદરા શહેરના સિનિયર ધારાસભ્ય યોગેશ પટેલને મુંબઈ પોલીસના નામે ફોન કરીને હાઉસ એરેસ્ટની જાળમાં ફસાવાનો પ્રયાસ કર્યો હતો. પરંતુ નિષ્ફળ નીવડયાં હતાં. તમારું નામ યોગેશ પટેલ છે ? તમારા નામે નોટિસ નીકળી છે તેવું જણાવતાની સાથે ધારાસભ્યએ આગળની વાત સાંભળ્યાં સિવાય પરખાવ્યું હતું કે, તું જે સ્કૂલમાં ભણે છે તે સ્કૂલનો હું પ્રિન્સિપાલ રહી ચૂક્યો છું.
[[$googlead]]
સાઈબર ક્રિમિનલે ફોન ડિસકનેક્ટ કર્યો હતો
ધારાસભ્યએ રાજ્યના ઉપ મુખ્યમંત્રી હર્ષ સંઘવીને પણ જાણ કરી હતી. પોલીસ કમિશનરના હુકમથી સાઈબર સેલ દ્વારા તપાસ શરૂ કરવામાં આવી છે. શહેરના માંજલપુર વિધાનસભાના ધારાસભ્ય યોગેશ પટેલે જણાવ્યું હતું કે, રવિવારે સવારે ૧૧-૨૭ વાગે મારા મોબાઈલ ઉપર અજાણ્યા નંબર ઉપરથી રિંગ આવી હતી. ફોન રિસીવ કરતાંની સાથે સામેના છેડેથી વ્યક્તિએ હિંદીમાં જણાવ્યું હતું કે, હું મુંબઈ પોલીસમાંથી વાત કરું છું. તમારું નામ વોગેશ પટેલ છે ? આ નંબર તમે યૂઝ કરો છો ? તમારા નામ ઉપર એક નોટિસ ઈશ્યૂ કરી છે તેમ કહ્યું હતું.
આ વાત સાંભળતાની સાથે યોગેશ પટેલ સમજી ગયા હતા કે ફોડ કૉલ છે
ધારાસભ્યએ અજાણ્યા વ્યકિતની વાત કાપી નાંખી હતી અને અધવચ્ચે રોકડું સંભળાવ્યું હતું કે ભાઈ તું જે સ્કૂલમાં ભણે છે તે સ્કૂલનો હું પ્રિન્સિપાલ રહી ચૂક્યો છું. આ વાત સાંભળીને સામેવાળી વ્યક્તિએ ફોન ડિસકનેક્ટ કર્યો હતો. ત્યારપછી યોગેશ પટેલે શહેર પોલીસ કમિશનર નરસિમ્હા કોમરને ફોન જોડયો હતો અને હકીકત કહી હતી. સીપીની સૂચનાથી સાઈબર ક્રાઈમ સેલે તપાસ શરૂ કરી છે. યોગેશ પટેલે બીજો કૉલ રાજ્યના ઉપ મુખ્યમંત્રી હર્ષ સંઘવીને જોડયો હતો અને શહેરમાં આડેધડ રીતે વેચાતા મોબાઈલ ફોનના સિમકાર્ડ ઉપર કડક નિયંત્રણ લાવવા સૂચન કર્યુ હતું.
સાઈબર ક્રિમિનલોએ મુંબઈ પોલીસનો નકલી લોગો બનાવ્યો
નાગરિકો સાથે ઠગાઈ કરવા માટે સાઈબર વૉટસએપ નંબરના ડીપીમા પણ મુંબઈ પોલીસનો નકલી લોગો લગાવ્યો હતો. સામાન્ય રીતે વૉટસએપ કોલિંગમાં મુંબઈ પોલીસનો લોગો જોઈને ભલભલાને પરસેવો છૂટે છે. પરંતુ યોગેશ પટેલને પ્રથમ નજરે જ લાગ્યુ કે આ લોગો નકલી છે અને સામેના છેડેથી વાત કરનાર વ્યકિત સાઈબર ક્રિમિનલ હોઈ શકે છે.
