રાજકોટ શહેરમાં આજે કાળી ચૌદશ અને શનિવાર એકસાથે એક જ દિવસે આવવાથી ધાર્મિક દૃષ્ટિએ અનેરું અને વિશેષ મહત્ત્વ જોવા મળ્યું છે. આ ખાસ સંયોગ નિમિત્તે માતા કાળી, હનુમાનજી તેમજ ન્યાયાના દેવતા શનિદેવની આરાધના કરવાનું વિશેષ મહત્ત્વ માનવામાં આવે છે. આ દિવસે લોકો પોતાના નકારાત્મક વિચારોને દૂર કરીને સારા કર્મો કરવાનો સંકલ્પ લે છે અને દિવ્ય ઊર્જા પ્રાપ્ત કરે છે.
જ્યુબિલી સ્થિત પૌરાણિક શનિ મંદિરે ભક્તોની ભીડ
આ પવિત્ર અવસરે રાજકોટના પ્રખ્યાત અને અતિ પૌરાણિક જ્યુબિલી શનિદેવ મંદિરે વહેલી સવારથી જ ભક્તોની ભારે ભીડ જામી હતી. દૂર-દૂરથી આવેલા શ્રદ્ધાળુઓએ શનિદેવના દર્શન કરી ધન્યતા અનુભવી હતી. આ મંદિરનો ઇતિહાસ ખૂબ જૂનો છે અને અહીં આવતા ભક્તોની તમામ મનોકામનાઓ પૂર્ણ થતી હોવાની આસ્થા જોડાયેલી છે.
કાશીના લોકો દ્વારા થઈ હતી મંદિરની સ્થાપના
મંદિરના પૂજારી રમેશભાઈ ત્રિવેદીએ આ વિશે વિશેષ માહિતી આપતા જણાવ્યું હતું કે, હું છેલ્લા 19 વર્ષથી આ મંદિરમાં પૂજારી તરીકે સેવા આપું છું. કાળી ચૌદશ નિમિત્તે શનિદેવની પૂજા-અર્ચના કરવી ખૂબ જ ફળદાયી છે. આજના દિવસે હનુમાનજી અને કાળ ભૈરવની પૂજા કરવાથી ભક્તોના તમામ દુઃખ-દર્દ દૂર થાય છે. આ શનિદેવ મંદિર અત્યંત પૌરાણિક છે, અને કાશીના લોકો દ્વારા આ મંદિરની સ્થાપના કરવામાં આવી હતી, જેથી તેનું માહાત્મ્ય અનેકગણું વધી જાય છે.
રાજકોટ અને આસપાસના શહેરોમાંથી ઉમટ્યા શ્રદ્ધાળુઓ
જ્યુબિલી સ્થિત આ પૌરાણિક શનિ મંદિરે માત્ર રાજકોટ જ નહીં પરંતુ રાજ્યના અન્ય શહેરોમાંથી પણ મોટી સંખ્યામાં ભક્તો દર્શન અને પૂજા-અર્ચના માટે પહોંચ્યા હતા. શનિ મંત્રના જાપ અને હનુમાન ચાલીસાના પાઠથી સમગ્ર મંદિર પરિસર ભક્તિમય બની ગયું હતું.
આ પણ વાંચો: Rajkotના રેસકોર્સ ગ્રાઉન્ડ ખાતે મનપા દ્વારા આયોજિત આતશબાજી નિહાળવા 50 હજારથી વધુ લોકો ઉમટ્યા!
