બોલીવુડ અભિનેતા તુષાર કપૂર સાથે જોડાયેલી એક ચોંકાવનારી ઘટના સામે આવી છે. તાજેતરમાં જ એક અજાણ્યા વ્યક્તિએ ફોન કરીને પોતાને લોરેન્સ બિશ્નોઈ ગેંગનો 'હેરી બોક્સર' બતાવ્યો હતો અને અભિનેતા પાસે સીધા ₹5 કરોડની ખંડણી માંગી હતી. આટલી મોટી રકમની માંગણીથી સાવધ થઈને તુષાર કપૂરે કોઈપણ જાતનું જોખમ લીધા વગર તરત જ મુંબઈ પોલીસનો સંપર્ક કરી લેખિત ફરિયાદ નોંધાવી હતી. આ મામલાની સંવેદનશીલતાને ધ્યાનમાં રાખીને પોલીસે આખો કેસ એન્ટી-એક્સટોર્શન સેલ અને ક્રાઈમ બ્રાન્ચને સોંપ્યો હતો. 

તુષાર કપૂરને ધમકી મામલે થશે તપાસ

મુંબઈ ક્રાઈમ બ્રાન્ચે ટેકનિકલ ટીમની મદદથી ધમકીભર્યા કોલનું રેકોર્ડિંગ મેળવ્યું હતું. ત્યારબાદ પોલીસે આ અવાજની સરખામણી પોલીસ રેકોર્ડમાં રહેલા અસલી "હેરી બોક્સર" ના અવાજ સાથે કરી હતી. ફોરેન્સિક પરીક્ષણમાં સ્પષ્ટ થયું કે બંને અવાજો બિલકુલ મેળ ખાતા નથી, એટલે કે ધમકી આપનાર વ્યક્તિ હેરી બોક્સર નહોતો. આ તપાસથી સાબિત થઈ ગયું કે અભિનેતાને ડરાવવા અને પૈસા પડાવવા માટે કોઈએ જાણી જોઈને કુખ્યાત ગેંગના નામનો દુરુપયોગ કર્યો હતો.

મુંબઈ ક્રાઈમ બ્રાન્ચના હાથમાં કેસ

મુંબઈ ક્રાઈમ બ્રાન્ચ અને સાયબર ટીમ હાલ આ બનાવટી ફોન કરનાર અજાણ્યા શખ્સને પકડવા માટે દિવસ-રાત તપાસ કરી રહી છે. કોલ ડિટેલ્સ, લોકેશન અને ઇન્ટરનેટ એડ્રેસના આધારે આરોપીની સઘન ભાળ મેળવવામાં આવી રહી છે. પોલીસનું માનવું છે કે આરોપીએ બચવા માટે નકલી સિમ કે ઇન્ટરનેટ કોલનો સહારો લીધો હશે, છતાં તે જલ્દી જ પોલીસ પકડમાં આવી જશે.

ધમકી બાદ નથી દાખલ કરાઈ FIR

આ સમગ્ર મામલે ખાસ વાત એ છે કે પોલીસે હજુ સુધી કોઈ ઔપચારિક FIR દાખલ કરી નથી. સૂત્રોના જણાવ્યા અનુસાર, આરોપીની ચોક્કસ ઓળખ અને પુરાવા સામે આવ્યા બાદ કડક કલમો હેઠળ ગુનો નોંધવામાં આવશે. હાલમાં અભિનેતા તુષાર કપૂર સંપૂર્ણપણે સુરક્ષિત છે અને પોલીસ તેમની સુરક્ષા પર સતત નજર રાખી રહી છે. ટાઈગર શ્રોફ પર હુમલા બાદ ટૂંકા સમયમાં તુષાર કપૂરને ધમકી મળતા બોલીવુડમાં ખોફનો માહોલ છવાયો. આ મામલે મુંબઈ પોલીસ ક્રાઈમ બ્રાન્ચ સઘન તપાસ હાથ ધરશે.


આ પણ વાંચો : Ramayana : 'રવિ દુબેને ઓસ્કાર મળશે...', લક્ષ્મણનું દમદાર પોસ્ટર સામે આવતાં જ ફેન્સ થયા ક્રેઝી!