બોલીવુડના ખિલાડી અક્ષય કુમારના પુત્ર આરવ ભાટિયા ફિલ્મી દુનિયા અને ગ્લેમરથી દૂર રહેવાનું પસંદ કરે છે. તે વિદેશમાં રહીને અન્ય ક્ષેત્રમાં પોતાની કારકિર્દી બનાવવામાં વ્યસ્ત છે. ખુદ અક્ષય કુમારે પણ અગાઉ જણાવ્યું હતું કે આરવ ફિલ્મ ઇન્ડસ્ટ્રીમાં કરિયર બનાવવા માગતો નથી. આરવ ભલે સોશિયલ મીડિયાથી અંતર જાળવી રાખતો હોય, પરંતુ જ્યારે પણ તે કોઈ જાહેર સ્થળે સ્પોટ થાય છે ત્યારે તે ચર્ચાનું કેન્દ્ર બની જાય છે. તાજેતરમાં પોતાના બર્થડે સેલિબ્રેશન દરમિયાન તે પોતાના લુકને લઈને ચર્ચામાં રહ્યો હતો અને હવે દિવાળી પાર્ટીમાં પહોંચીને તેણે સૌનું ધ્યાન પોતાની તરફ ખેંચી લીધું છે.
દિવાળી પાર્ટીમાં છવાયો આરવ ભાટિયા
8 નવેમ્બરે દિવાળીનો તહેવાર છે અને તે પહેલાં જ બોલીવુડમાં પ્રી-સેલિબ્રેશનનો ધમધમાટ શરૂ થઈ ચૂક્યો છે. ફિલ્મ સિતારાઓએ દિવાળી પાર્ટીઓનું આયોજન કરવાનું શરૂ કરી દીધું છે. અગાઉ આયુષ્માન ખુરાના અને તાહિરા કશ્યપે પોતાના ઘરે સ્ટાર-સ્ટડેડ દિવાળી પાર્ટી રાખી હતી, જેમાં અનેક સેલેબ્સે હાજરી આપી હતી. બીજી તરફ મનીષ મલ્હોત્રાએ પણ એક ભવ્ય દિવાળી પાર્ટીનું આયોજન કર્યું હતું, જેમાં માધુરી દીક્ષિત, શ્રીરામ નેને, કરીના કપૂર, સૈફ અલી ખાન અને શાહીન ભટ્ટ સહિત બોલીવુડના દિગ્ગજો પહોંચ્યા હતા. અક્ષય કુમાર અને ટ્વિંકલ ખન્ના પણ આ પાર્ટીમાં પુત્ર આરવ સાથે પહોંચ્યા હતા, જ્યાં તેમનો અંદાજ જોવા જેવો હતો.
