અમિતાભ બચ્ચન હિન્દી સિનેમાના સૌથી મોટા સ્ટાર્સમાંના એક છે. તેમની એક ઝલક મેળવવા માટે ફેન્સ તેમના ઘરની બહાર કલાકો સુધી લાઈનો લગાવીને ઉભા રહે છે અને આ સિલસિલો વર્ષોથી ચાલી રહ્યો છે. બિગ બી હિન્દી સિનેમા પર 5 દાયકાથી પણ વધુ સમયથી રાજ કરી રહ્યા છે અને 83 વર્ષની ઉંમરે પણ તેમની જબરદસ્ત ફેન ફોલોઈંગ છે. પરંતુ, શું તમે એ સ્ટાર વિશે જાણો છો, જેમને જોઈને ખુદ બિગ બી પણ આશ્ચર્યચકિત થઈ ગયા હતા? આ સ્ટાર બીજું કોઈ નહીં પણ માઈકલ જેક્સન હતા, જેમને જોઈને અમિતાભ બચ્ચન લગભગ બેભાન થઈ જાય તેવી હાલતમાં આવી ગયા હતા. બિગ બીએ પોતે પોતાના લોકપ્રિય ક્વિઝ રિયાલિટી શો કૌન બનેગા કરોડપતિમાં આ કિસ્સો શેર કર્યો હતો.
માઈકલ જેક્સનને જોઈને હેરાન રહી ગયા હતા અમિતાભ બચ્ચન
અમિતાભ બચ્ચને KBC દરમિયાન માઈકલ જેક્સન સાથેની મુલાકાતનો કિસ્સો શેર કર્યો હતો. તેમણે શોમાં આ કિસ્સો જણાવતા કહ્યું કે તેઓ ન્યૂયોર્કમાં હતા, ત્યારે તેમના હોટલના રૂમમાં અચાનક દરવાજો ખખડ્યો અને જેવો તેમણે દરવાજો ખોલ્યો તો સામેનું દ્રશ્ય જોઈને તેમને પોતાની આંખો પર વિશ્વાસ જ ન આવ્યો. સામે માઈકલ જેક્સન ઉભા હતા, જેમને જોઈને બિગ બી લગભગ બેભાન જેવી હાલતમાં હતા. તેમને વિશ્વાસ નહોતો આવતો કે માઈકલ જેક્સન તેમના રૂમ સુધી પહોંચી આવ્યા છે.
માઈકલ જેક્સન સાથે અમિતાભ બચ્ચનની મુલાકાત
અમિતાભે પદ્મશ્રી ડૉ. અભય અને ડૉ. રાની બાંગ સાથેની વાતચીત દરમિયાન માઈકલ જેક્સન સાથેની મુલાકાતનો કિસ્સો યાદ કરતા કહ્યું, હું ન્યૂયોર્કની એક હોટલમાં રોકાયો હતો. એક દિવસ, મેં મારા હોટલ રૂમના દરવાજે ટકોરા સાંભળ્યા. જેવો મેં દરવાજો ખોલ્યો કે સામેનું દ્રશ્ય જોઈ દંગ રહી ગયો. મારી સામે માઈકલ જેક્સન ઉભા હતા. તેમને મારી સામે જોઈને લાગ્યું જાણે હું લગભગ બેભાન થઈ ગયો, પરંતુ પછી મેં ગમે તેમ કરીને મારી જાતને સંભાળી. તેમને જોઈને મેં તેમનું અભિવાદન કર્યું. પછી તેમણે મને પૂછ્યું કે શું આ તેમનો રૂમ છે? મેં તેમના સવાલનો જવાબ આપતા જણાવ્યું કે ના, આ તેમનો નહીં પણ મારો રૂમ છે. ત્યારે તેમને ખબર પડી કે તેઓ ભૂલથી ખોટા રૂમમાં આવી ગયા છે.
બિગ બીએ કર્યા હતા માઈકલ જેક્સનના વખાણ
બિગ બીએ જણાવ્યું કે આ મુલાકાત અહીં જ પૂરી ન થઈ. તેઓ કહે છે- તેઓ પોતાના રૂમમાં ચાલ્યા ગયા. પરંતુ, પછી તેમણે તે વ્યક્તિનો સંપર્ક કરવા માટે પોતાના સ્ટાફ મેમ્બરને મોકલ્યા, જેના રૂમમાં તેઓ ભૂલથી ઘૂસી ગયા હતા. ત્યારબાદ મને તેમની સાથે બેસવાની અને વાત કરવાની તક મળી. આટલી મોટી હસ્તી હોવા છતાં તેઓ ખૂબ જ નમ્ર વ્યક્તિ હતા. તો આ રીતે મારી માઈકલ જેક્સન સાથે પહેલી મુલાકાત થઈ હતી.
સિનેમાઘરોમાં રિલીઝ થઈ માઈકલ જેક્સનની બાયોપિક
કિંગ ઓફ પોપ તરીકે જાણીતા માઈકલ જેક્સન પર બનેલી બાયોપિક માઈકલ હાલમાં જ સિનેમાઘરોમાં રિલીઝ થઈ છે. એન્ટોની ફુક્વા દ્વારા નિર્દેશિત અને જોન લોગન દ્વારા લિખિત આ ફિલ્મમાં માઈકલ જેક્સનનો ભત્રીજો જાફર જેક્સન લીડ રોલમાં છે. જાફર એ માઈકલ જેક્સનના મોટા ભાઈ જરમેન જેક્સનનો પુત્ર છે. ખાસ વાત તો એ છે કે આ ફિલ્મ જાફરની ડેબ્યુ ફિલ્મ છે, જેણે કિંગ ઓફ પોપના જાદુને ફરી જીવંત કર્યો છે.
આ પણ વાંચો- TMKOC : 18 વર્ષ બાદ તારક મહેતા છોડશે બાપુજી? શોમાં બતાવ્યો મોતનો ટ્રેક, જેઠાલાલની ચીસોથી ફેન્સ ફફડી ઉઠ્યા!
