બોલિવૂડમાં પોતાની અલગ ઓળખ બનાવનારી અભિનેત્રી તાપસી પન્નુ ફરી એક વખત પોતાની સ્પષ્ટવાદી વાતો કારણે ચર્ચામાં છે. પોતાની આગામી ફિલ્મ અસ્સી અને ગંભીર ભૂમિકાઓના માનસિક પ્રભાવ વિશે તાપસીએ ખુલ્લેઆમ દિલની વાત કરી છે.
તાપસી પન્નુ ટૂંક સમયમાં ફિલ્મ ‘અસ્સી’માં જોવા મળશે, જેમાં તે મહિલાઓ પર થતા અત્યાચાર સામે લડતી એક મજબૂત વકીલની ભૂમિકા ભજવી રહી છે. આ ફિલ્મ 20 ફેબ્રુઆરીએ રિલીઝ થવાની છે. તાપસીનું કહેવું છે કે તે પરંપરાગત નાયિકા બનવાને બદલે હંમેશા પડકારજનક અને વિચારશીલ ભૂમિકાઓ કેમ પસંદ કરે છે.
તાપસીએ કહ્યું કે તેણે ક્યારેય ટ્રેન્ડને ફોલો કર્યો નથી. તેના શબ્દોમાં, તેણે પોતાની જાતને હંમેશા મુશ્કેલ રસ્તે ધકેલી છે, કારણ કે એમાં રહેલી મજા અને સફળતાની મીઠાશ કંઈક અલગ જ હોય છે. દક્ષિણ ભારતીય ફિલ્મોથી કારકિર્દી શરૂ કર્યા બાદ તેણે મોટી ફિલ્મો, મોટા સેટ અને ગ્લેમરનો અનુભવ કર્યો, પરંતુ એ બધું તેના માટે સાચું કામ ન કરી શક્યું. જ્યારે તેણે અનોખી વાર્તા અને મજબૂત પાત્રો પસંદ કર્યા, ત્યારે જ તેને સાચી ઓળખ અને સંતોષ મળ્યો.
તાપસી માને છે કે આ પસંદગી એક બેધારી તલવાર જેવી છે. એક તરફ તેને ચોક્કસ રિકોલ વેલ્યુ મળી છે અને લોકો તેને ગંભીર વિષયોની અભિનેત્રી તરીકે ઓળખે છે, પરંતુ બીજી તરફ દરેક ફિલ્મ પછી તેની માનસિક સ્થિતિ પર ભારે અસર પડે છે. તે કહે છે કે તે તાલીમ પામેલી અભિનેત્રી નથી જે પાત્રને સ્વિચ ઓન અને ઓફ કરી શકે, એટલે તેના મન અને હૃદયનો એક ભાગ પાત્રમાં જ રહી જાય છે.
ફિલ્મ પિંક વિશે વાત કરતા તાપસીએ ખૂબ જ ભાવુક ખુલાસો કર્યો. પીડિતાનો રોલ ભજવતા તે એટલી અસરગ્રસ્ત થઈ ગઈ હતી કે નાની નાની વાતે રડી પડતી. 10થી 12 કલાકની લાંબી શિફ્ટ અને સતત 30–35 દિવસ સુધી પીડાની લાગણી સાથે જીવવાથી તે અંદરથી બદલાઈ ગઈ હતી. તેણે કહ્યું કે પિંક પછી સામાન્ય સ્થિતિમાં પાછા આવવામાં તેને ત્રણથી ચાર અઠવાડિયા લાગ્યા. રસ્તા પર કોઈ દુઃખી વ્યક્તિને જોઈને પણ તે ભાવુક થઈ જતી હતી. તાપસીના કહેવા મુજબ, આવા પાત્રોની અસર એટલી ઊંડી હોય છે કે તેની જીવનશૈલી પણ બદલાઈ જાય છે. તેણે મજાકમાં કહ્યું કે તેના કપડા સુધી બદલાઈ જાય છે, એટલી અસર પડે છે.
આગામી ફિલ્મ ‘અસ્સી’ વિશે વાત કરતા તાપસીએ જણાવ્યું કે આ ફિલ્મ ત્યાંથી શરૂ થાય છે જ્યાં ‘પિંક’ પૂરી થઈ હતી. આ ફિલ્મ દ્વારા તેનો ફરી એક વખત સહયોગ થયો છે અનુભવ સિંહા સાથે. તાપસી માને છે કે બંનેની વિચારધારા એક જેવી હોવાથી સાથે કામ કરવાનો અનુભવ હંમેશા ખાસ અને સંતોષકારક રહે છે. આ રીતે તાપસી પન્નુ માત્ર એક અભિનેત્રી નહીં, પરંતુ પોતાની ભૂમિકાઓ દ્વારા સમાજને અરીસો બતાવતી કલાકાર તરીકે સામે આવે છે.
આ પણ વાંચો : Entertainment : ટીવીથી OTT સુધી સફળ, છતાં બોલિવૂડથી દૂર કેમ? આ અભિનેતાની સ્પષ્ટ વાત