બોલીવુડમાં એક સમય એવો હતો જ્યારે મધ્યમ બજેટની, પરંતુ મજબૂત સામાજિક સંદેશ આપતી ફિલ્મો દર્શકોના દિલ જીતી લેતી હતી. આ ફિલ્મો મસાલા કે મોટા સ્ટારડમ પર નહીં, પરંતુ સાચી ઘટના, મજબૂત વાર્તા અને અસરકારક અભિનય પર આધારિત હતી. પરંતુ છેલ્લા કેટલાક વર્ષોમાં આ પ્રકારની ફિલ્મો ઓછી થતી જોવા મળી રહી છે.
અસ્સીના ખાસ સ્ક્રીનિંગ
તાજેતરમાં, અસ્સીના ખાસ સ્ક્રીનિંગ દરમિયાન તાપસી પન્નુએ જે કહ્યું, તે માત્ર એક અભિનેત્રીનો ડર નથી, પરંતુ આજના સિનેમા ઇકોસિસ્ટમની કડવી હકીકત છે. તેમનું કહેવું છે કે જો આવી ફિલ્મો થિયેટરમાં નહીં ચાલે, તો OTT પ્લેટફોર્મ્સ પણ તેને ખરીદવાનું બંધ કરી દેશે. આ વાત ચિંતાજનક છે, કારણ કે ઘણા દર્શકો આજે પણ માને છે કે “થિયેટરમાં નહીં જોશું, OTT પર જોઈ લઈશું”.
અનુભવ સિંહા અને તાપસી પન્નુની સામાજિક સિનેમાની સફર
અનુભવ સિંહા અને તાપસી પન્નુએ અગાઉ પણ સમાજને અરીસો બતાવતી ફિલ્મો આપી છે. મુલ્ક અને થપ્પડ જેવી ફિલ્મોએ સંવેદનશીલ મુદ્દાઓ પર ચર્ચા શરૂ કરી હતી. આવી ફિલ્મો માત્ર મનોરંજન પૂરતી નહોતી, પરંતુ વિચાર જગાવતી હતી. લોકડાઉન પહેલાં બોલીવુડમાં “મિડ-બજેટ સોશિયલ ફિલ્મ” એક મજબૂત શૈલી હતી. આર્ટિકલ 15, પિંક, બાલા જેવી ફિલ્મોએ બતાવ્યું કે સમાજના ગંભીર મુદ્દાઓને પણ વ્યાપક રીતે રજૂ કરી શકાય છે.
લોકડાઉન પછી શું બદલાયું?
લોકડાઉન દરમિયાન OTT પ્લેટફોર્મ્સે ઘણી ફિલ્મો ઊંચી કિંમતે ખરીદી, પરંતુ 2022 પછી સિસ્ટમ બદલાઈ ગઈ. હવે એક બિનસત્તાવાર નિયમ બની ગયો છે – જે ફિલ્મ બોક્સ ઓફિસ પર નહીં ચાલે, તેને OTT પર પણ જગ્યા નહીં મળે. આ કારણે ઘણી પ્રશંસિત ફિલ્મો બોક્સ ઓફિસ પર નિષ્ફળ ગઈ અને પછી OTT પર પણ અટકી ગઈ. ચંડીગઢ કરે આશિકી, ઝુંડ, ભીડ, બધાઈ દો જેવી ફિલ્મો તેનું ઉદાહરણ છે.
તૈયાર ફિલ્મો પણ અટવાઈ ગઈ
તાજેતરના અહેવાલો મુજબ, છેલ્લા 2–3 વર્ષમાં બનેલી 50થી વધુ ફિલ્મો ખરીદદારોના અભાવે રિલીઝ થવાની રાહ જોઈ રહી છે. ધ કન્ફેશન, સેક્શન 84, ધ રેપિસ્ટ જેવી ફિલ્મો પણ આ યાદીમાં છે. જો દર્શકો થિયેટરમાં જઈને આવી ફિલ્મોને ટેકો નહીં આપે, તો નિર્માતાઓ અને કલાકારો પણ જોખમ લેવાનું બંધ કરી દેશે. પરિણામે, તાપસી પન્નુ, આયુષ્માન ખુરાના અને યામી ગૌતમ જેવા કલાકારોને પણ મસાલા ફિલ્મોમાં જ સીમિત થવું પડશે.
આ પણ વાંચો : Entertainment : ‘હું રડું છું, મારા કપડા બદલાય છે’ ગંભીર ભૂમિકાઓથી તાપસી પન્નુ થાય છે હેરાન
