ફેશન અને ગ્લેમરની દુનિયામાં સેલિબ્રિટીઓ હંમેશા કંઈક નવું અને નાટકીય કરવા માટે જાણીતા હોય છે. તાજેતરમાં નાઇજીરીયામાં યોજાયેલા 'આફ્રિકા મેજિક વ્યૂઅર્સ ચોઇસ એવોર્ડ્સ' (AMVCA) ની 12મી આવૃત્તિમાં પણ આવો જ એક નઝારો જોવા મળ્યો હતો. આ એવોર્ડ શોમાં જ્યારે રિયાલિટી ટીવી સ્ટાર અને મોડેલ ક્વીન મર્સી અટાંગે એન્ટ્રી કરી, ત્યારે રેડ કાર્પેટ જાણે એક બેકરીમાં ફેરવાઈ ગયું હોય તેવું લાગતું હતું.
500 બ્રેડમાંથી બનેલો અદભૂત ડ્રેસ
ક્વીન મર્સી અટાંગના આ દેખાવની સૌથી ખાસ વાત તેનો ડ્રેસ હતો. આ ડ્રેસના નીચેના ભાગમાં એટલે કે ઘેરાવમાં અસલી બ્રેડની 500 જેટલી વેણીઓ (Braided Bread) નો ઉપયોગ કરવામાં આવ્યો હતો. આ ડ્રેસમાં ઉપરના ભાગે ગોલ્ડન ડિટેલિંગ અને ડીપ નેકલાઇન હતી, જ્યારે નીચેનો આખો ભાગ તાજી શેકેલી બ્રેડ જેવી દેખાતી વેણીઓથી ઢંકાયેલો હતો. આ ડ્રેસ એટલો ભારે અને નાટકીય હતો કે મર્સી અટાંગને ચાલવામાં મદદ કરવા માટે સહાયકોની જરૂર પડી હતી.
શાહી ઠાઠ અને માર્કેટિંગ સ્ટન્ટ
આ લુકને વધુ પ્રભાવશાળી બનાવવા માટે મર્સી અટાંગની સાથે આવેલા સહાયકોએ હાથમાં બ્રેડથી ભરેલી ટોપલીઓ પકડી હતી, જે જૂના જમાનાના રાજવી ઠાઠની યાદ અપાવતી હતી. તેણે હેવી નેકપીસ, સ્લીક હેરસ્ટાઇલ અને મોનોક્રોમેટિક મેકઅપ સાથે પોતાના લુકને પૂર્ણ કર્યો હતો. સોશિયલ મીડિયા પર આ ડ્રેસ તરત જ વાયરલ થઈ ગયો હતો. નિષ્ણાતો તેને એક શાનદાર માર્કેટિંગ મૂવ તરીકે જોઈ રહ્યા છે, જેણે આખા એવોર્ડ શોની લાઈમલાઈટ પોતાની તરફ ખેંચી લીધી હતી.
અન્ય સેલિબ્રિટીઓના આકર્ષક લુક્સ
માત્ર મર્સી અટાંગ જ નહીં, પરંતુ અન્ય સેલિબ્રિટીઓએ પણ પોતાની ફેશન સેન્સથી લોકોને પ્રભાવિત કર્યા હતા. ફેશન આઇકોન નાના અકુઆ એડોએ જર્મનીના કોલોન કેથેડ્રલથી પ્રેરિત સિલ્વર આર્કિટેક્ચરલ ડ્રેસ પહેર્યો હતો, જે કળાનો ઉત્તમ નમૂનો લાગતો હતો. જ્યારે નાઇજીરીયન અભિનેત્રી ઉચે મોન્ટાના લાલ પીંછાવાળા ટ્રેલ ડ્રેસમાં ખૂબ જ સુંદર દેખાતી હતી. આમ, AMVCA ના રેડ કાર્પેટ પર કલા, સંસ્કૃતિ અને ફેશનનો એક અનોખો સંગમ જોવા મળ્યો હતો, જેમાં 'બ્રેડ ડ્રેસ' વર્ષની સૌથી યાદગાર ફેશન મોમેન્ટ બની ગઈ હતી.
આ પણ વાંચોઃ Actress ઇશા દેઓલની નવી શરૂઆત, પિતા ધર્મેન્દ્રને યાદ કરી ભાવુક પોસ્ટ, ભાઈ બોબી દેઓલની સુંદર પ્રતિક્રિયા
