ભારતીય બોક્સ ઓફિસ પર ઘણી મોટી ફિલ્મોને પાછળ છોડી ચૂકેલી ફિલ્મ 'હનુમાન અંશ'ની કમાણીનો સિલસિલો સતત ચાલુ છે. થિયેટરોમાં રિલીઝના 7 અઠવાડિયા પૂરા કર્યા પછી હવે ફિલ્મે પોતાનું 8મું અઠવાડિયું પણ શાનદાર રીતે પૂરું કર્યું છે. શરૂઆતમાં એકદમ ધીમી ગતિએ આગળ વધનારી આ ફિલ્મ હવે એવા મુકામે પહોંચી ગઈ છે, જ્યાં તેની સરખામણી ભારતીય સિનેમાની મોટી બોક્સ ઓફિસ હિટ ફિલ્મો સાથે થઈ રહી છે. 8મા વીકેન્ડ પછી ફિલ્મે દુનિયાભરમાં 400 કરોડ રૂપિયાથી વધુનું ગ્રોસ કલેક્શન કરી લીધું છે. એટલું જ નહીં, તે હવે ભારતીય સિનેમાની સૌથી વધુ કમાણી કરનારી ફિલ્મોની ટોપ 50 યાદીમાં પણ સામેલ થઈ ગઈ છે.
પહેલા 2 અઠવાડિયામાં ઘણી ધીમી હતી ઝડપ
'હનુમાન અંશ'ની શરૂઆત જોઈને ભાગ્યે જ કોઈએ અંદાજ લગાવ્યો હશે કે ફિલ્મ આવનારા અઠવાડિયામાં આટલો મોટો રેકોર્ડ બનાવી દેશે. ફિલ્મે થિયેટરોમાં માત્ર 10 લાખ રૂપિયાનું ઓપનિંગ લીધું હતું. શરૂઆતના 2 અઠવાડિયા સુધી ટિકિટ બારી પર તેનું પ્રદર્શન ખાસ ન રહ્યું અને આ દરમિયાન ફિલ્મની કુલ નેટ કમાણી આશરે 1.50 કરોડ રૂપિયા સુધી જ પહોંચી શકી હતી. તે સમયે એવું લાગતું હતું કે ફિલ્મ જલ્દી જ થિયેટરોમાંથી હટી શકે છે. જોકે 3જા અઠવાડિયા પછી ફિલ્મની વાર્તા અને ઈમોશનલ જોડાણને લઈને દર્શકોનો રિસ્પોન્સ બદલાવા લાગ્યો. સોશિયલ મીડિયા અને લોકો વચ્ચે ફિલ્મની ચર્ચા વધી અને તેની સીધી અસર બોક્સ ઓફિસ પર જોવા મળી. ત્યારપછી ફિલ્મની કમાણી ઝડપથી વધવા લાગી. 4થા અઠવાડિયાથી લઈને સતત ઘણા અઠવાડિયા સુધી ફિલ્મે ભારતીય બોક્સ ઓફિસ પર 60 કરોડ રૂપિયાથી વધુનું નેટ કલેક્શન કર્યું.
8મા વીકેન્ડમાં પણ જબરદસ્ત કમાણી
ફિલ્મનું 8મું વીકેન્ડ પણ ઘણું મજબૂત રહ્યું. રિપોર્ટ મુજબ 'હનુમાન અંશ' ફિલ્મે શનિવાર અને રવિવાર સાથે વીકેન્ડમાં આશરે 18.95 કરોડ રૂપિયાનું નેટ કલેક્શન કર્યું. જેમાં રવિવારનું પ્રદર્શન ખાસ રહ્યું, જ્યારે ફિલ્મે માત્ર 1 જ દિવસમાં આશરે 9 કરોડ રૂપિયાની કમાણી કરી. આ પ્રદર્શન પછી ભારતમાં ફિલ્મનું કુલ નેટ કલેક્શન આશરે 307 કરોડ રૂપિયા થઈ ગયું છે. વળી દેશના બોક્સ ઓફિસ પર તેનું ગ્રોસ કલેક્શન લગભગ 362 કરોડ રૂપિયા સુધી પહોંચી ચૂક્યું છે. રવિવારે ફિલ્મે ભારતમાં 300 કરોડ રૂપિયા નેટનો આંકડો પણ વટાવી દીધો. આ પહેલાં ગણીગાંઠી હિન્દી ફિલ્મો જ આ ક્લબમાં જોડાઈ શકી છે. 300 કરોડનો આંકડો વટાવ્યા પછી ફિલ્મની ટીમે અમિત શાહ સાથે મુલાકાત પણ કરી હતી.
દુનિયાભરમાં 400 કરોડને પાર પહોંચી ફિલ્મ
વિદેશી બજારમાં હનુમાન અંશ ભારતની સરખામણીએ ઘણી મોડી રિલીઝ કરવામાં આવી હતી. ફિલ્મની ઈન્ટરનેશનલ રિલીઝ ભારતની રિલીઝના લગભગ 6 અઠવાડિયા પછી થઈ હતી. તેમ છતાં વિદેશમાં પણ ફિલ્મની કમાણી ધીમે ધીમે મજબૂત બનતી ગઈ. નવા આંકડા મુજબ ફિલ્મે વિદેશી માર્કેટમાં 4 મિલિયન ડોલરથી વધુની કમાણી કરી લીધી છે. દેશ અને વિદેશના કલેક્શનને મેળવીને હનુમાન અંશનું વર્લ્ડવાઈડ ગ્રોસ કલેક્શન આશરે 402 કરોડ રૂપિયા સુધી પહોંચી ગયું છે. આ રીતે ફિલ્મે 400 કરોડ રૂપિયાની ક્લબમાં પોતાનું સ્થાન બનાવી લીધું છે.
ક્રિશ 3 અને ચેન્નઈ એક્સપ્રેસને પણ છોડી પાછળ
8મા અઠવાડિયામાં શાનદાર પ્રદર્શન દરમિયાન ફિલ્મે ઘણી ચર્ચિત ફિલ્મોના લાઈફટાઈમ કલેક્શનને પાછળ છોડી દીધું. રવિવારે હનુમાન અંશ ફિલ્મે ક્રિશ 3 અને ચેન્નઈ એક્સપ્રેસના કલેક્શનને પાર કર્યું. આ પછી ફિલ્મે 3 ઈડિયટ્સ અને કાંતારા જેવી ફિલ્મોના આંકડાને પણ પાછળ છોડી દીધા. ફિલ્મની હાલની ઝડપ જોતાં તે 450 કરોડ રૂપિયાના વર્લ્ડવાઈડ આંકડા સુધી પહોંચવાની ચર્ચા પણ થઈ રહી છે. જોકે આવનારા દિવસોમાં તેની કમાણી કેવી રીતે આગળ વધે છે, તે દર્શકોના રિસ્પોન્સ અને થિયેટરોમાં નવી રિલીઝ થતી ફિલ્મો પર નિર્ભર રહેશે.
શું છે હનુમાન અંશની સ્ટોરી?
વિશાલ ચતુર્વેદીના ડિરેક્શનમાં બનેલી હનુમાન અંશ એક આધ્યાત્મિક વાર્તા પર આધારિત ફિલ્મ છે. સ્ટોરી લક્ષ્મીનારાયણ નામના એક યુવાનની આસપાસ ફરે છે, જે પોતાની માતાને ગુમાવ્યા પછી જીવન, મૃત્યુ અને માણસના દુઃખોના જવાબો શોધવા નીકળી પડે છે. ઉત્તર ભારતની યાત્રા દરમિયાન તેની મુલાકાત આધ્યાત્મિક અનુભવો અને અલગ-અલગ પરિસ્થિતિઓ સાથે થાય છે. ધીમે ધીમે તેની આ શોધ તેને એક એવા આધ્યાત્મિક માર્ગ પર લઈ જાય છે, જ્યાં તે આગળ જતાં સંત નીમ કરોલી બાબા તરીકે ઓળખાય છે. ફિલ્મમાં શોભિનવ સત્ય મુખ્ય ભૂમિકામાં છે. તેમની સાથે વિહાન શેડગે, ચંદન કે આનંદ, પૂર્ણિમા તિવારી, અનિલ રસ્તોગી, ગુલશન પાંડે અને ભગવાનદાસ પટેલ જેવા કલાકારો પણ મહત્વના રોલમાં જોવા મળે છે.
આ પણ વાંચો-Bollywood : રકુલ પ્રીત, વાસુ ભગનાનીની કંપનીઓ પર ITની તવાઈ, લાગ્યા ગંભીર આરોપ
