બોલીવુડ અભિનેતા જાવેદ જાફરીની પત્ની હબીબા જાફરી કથિત રોકાણ કૌભાંડનો ભોગ બની છે. તેની સાથે આશરે 16.24 કરોડ રૂપિયાની છેતરપિંડી કરવામાં આવી. મામલાની તપાસ દરમિયાન એક BMC અધિકારીનું નામ સામે આવ્યું, જેના પછી તેમને સસ્પેન્ડ કરી દેવામાં આવ્યા છે.
વધુ વળતરની લાલચ આપી કરાયું રોકાણ
એવું જણાવવામાં આવી રહ્યું છે કે હબીબાએ સારા વળતરના વાદા પર મોટી રકમનું રોકાણ કર્યું હતું. પરંતુ બાદમાં તેને કથિત રીતે છેતરપિંડીની ખબર પડી. ફરિયાદ નોંધાયા પછી પોલીસ અને સંબંધિત એજન્સીઓએ તપાસ શરૂ કરી, જેના હેઠળ એક BMC અધિકારી સામે પણ કાર્યવાહી કરવામાં આવી છે. હાલમાં મામલાની તપાસ ચાલુ છે અને અધિકારીઓનું કહેવું છે કે આખા ઇન્વેસ્ટમેન્ટ નેટવર્ક અને આમાં સામેલ લોકોની ભૂમિકાની તપાસ કરવામાં આવી રહી છે.
બીએમસીએ મદદનીશ કમિશનરને કર્યા સસ્પેન્ડ
મુંબઈ મહાનગરપાલિકા (BMC) એ હબીબા જાફરી સાથે 16.24 કરોડ રૂપિયાની કથિત છેતરપિંડીના મામલામાં મોટી કાર્યવાહી કરતા કે-નોર્થ વોર્ડના મદદનીશ કમિશનરમહેશ પાટિલને તાત્કાલિક અસરથી સસ્પેન્ડ કર્યા છે. સસ્પેન્શનનો ઓર્ડર શુક્રવારે જાહેર કરવામાં આવ્યો હતો, જે 7 જૂને પાટિલને સોંપાયો હતો.
રીડેવલપમેન્ટ પ્રોજેક્ટના નામે બોગસ દસ્તાવેજો બનાવ્યા
મહેશ પાટિલ અને તેમના સહયોગીઓએ મુંબઈના બાંદ્રા વિસ્તારમાં એક પુનર્વિકાસ (રીડેવલપમેન્ટ) પ્રોજેક્ટમાં ભારે નફો અને ઊંચા વળતરની લાલચ આપીને હબીબા જાફરીને રોકાણ કરવા માટે રાજી કર્યા હતા. આરોપ છે કે આ કથિત છેતરપિંડીને અંજામ આપવા માટે નકલી અને બોગસ દસ્તાવેજો પણ તૈયાર કરવામાં આવ્યા હતા.
આરોપી અધિકારી ફરાર, ક્રાઇમ બ્રાન્ચે હાથ ધરી તપાસ
મામલામાં ખાર પોલીસ સ્ટેશનમાં FIR નોંધાયા પછીથી મહેશ પાટિલ ફરાર હોવાનું કહેવાય છે. પોલીસ હજી સુધી તેની ભાળ મેળવી શકી નથી. ખાર પોલીસે પાટિલ સહિત કુલ છ આરોપીઓ સામે છેતરપિંડીનો ગુનો નોંધ્યો છે. મામલાની ગંભીરતા અને મોટી રકમને જોતા તપાસ મુંબઈ ક્રાઈમ બ્રાન્ચને સોંપી દેવામાં આવી છે. ક્રાઈમ બ્રાન્ચની ટીમો હાલમાં કેટલાય સ્થળો પર દરોડા પાડી રહી છે અને ફરાર BMC અધિકારી સહિત અન્ય આરોપીઓની શોધખોળમાં લાગેલી છે.
આ પણ વાંચો-Mega Hit Movie : 90 કરોડમાં બનેલી એ ફિલ્મ, જેણે વર્ષ 2025માં બોક્સ ઓફિસ પર મચાવ્યો હતો તાંડવ!
