બોલીવુડની ઝાકઝમાળ ભરેલી દુનિયામાં એવા ઘણા સિતારાઓ આવ્યા, જેમની ચમકથી આખી દુનિયા રોશન હતી, પરંતુ તેમની અંગત જિંદગીનો અંધકાર ક્યારેય દૂર ન થઈ શક્યો. તેમને અપાર ખ્યાતિ મળી, લોકોએ તેમને પલકો પર બેસાડ્યા, પણ જ્યારે પોતાના સંબંધોની વાત આવી ત્યારે નસીબે એવો વળાંક લીધો કે બધું જ વેરવિખેર થઈ ગયું. અમે વાત કરી રહ્યા છીએ હિન્દી સિનેમાના દિગ્ગજ અભિનેત્રી લલિતા પવારની. તેમને રામાનંદ સાગરના પૌરાણિક શો રામાયણના મંથરા તરીકે ઓળખવામાં આવે છે.
પતિ અને સગી બહેને આપ્યો દગો
લલિતા પવારની અંગત જિંદગી ઘણી નાટ્યાત્મક હતી. તેમની સગી બહેને જ તેમનું વસેલું ઘર બરબાદ કરી દીધું હતું. લલિતાના પહેલા પતિ ગણપત રાવને તેમની બહેન સાથે અફેર હતું. જ્યારે લલિતાને પોતાના પતિ અને બહેનની આ કરતૂત વિશે ખબર પડી, ત્યારે તેમણે લગ્ન તોડી નાખ્યા. ત્યારબાદ લલિતા પવારે પ્રોડ્યુસર રાજપ્રકાશ ગુપ્તા સાથે બીજા લગ્ન કર્યા, જેમનાથી તેમને એક પુત્ર જય પવાર છે. જિંદગીમાં આટલા આંચકા સહન કર્યા પછી પણ લલિતા પવારને અંતિમ સમયે ઘણું દુઃખ વેઠવું પડ્યું હતું.
ત્રણ દિવસ સુધી ઘરમાં પડી રહી લાશ
લલિતા પવારનું નિધન 22 ફેબ્રુઆરી, 1998ના રોજ તેમના બંગલામાં થયું હતું. તેઓ મોઢાના કેન્સરથી પીડાતા હતા અને પુણેમાં સારવાર કરાવી રહ્યા હતા. રિપોર્ટ્સ અનુસાર, જ્યારે લલિતા પવારનું નિધન થયું ત્યારે તેઓ બંગલામાં એકદમ એકલા હતા, કારણ કે તેમના પતિ હોસ્પિટલમાં દાખલ હતા. તેમના નિધનના ત્રણ દિવસ પછી પરિવારને આ વાતની જાણ થઈ હતી. જ્યારે તેમના પુત્રએ ફોન કર્યો અને કોઈએ રિસીવ ન કર્યો, ત્યારે પરિવાર બંગલે પહોંચ્યો અને ત્યાં તેમની લાશ મળી આવી હતી.
એક અકસ્માતે કરિયર બરબાદ કર્યું
નાસિકમાં જન્મેલા લલિતા પવારને બાળપણથી જ એક્ટિંગનો શોખ હતો. માત્ર 9 વર્ષની ઉંમરે તેમણે ફિલ્મ રાજા હરિશ્ચંદ્રથી કરિયરની શરૂઆત કરી હતી. જોકે, 1942માં ફિલ્મ જંગ-એ-આઝાદીના શૂટિંગ દરમિયાન થયેલા એક અકસ્માતે તેમની જિંદગી બદલી નાખી. એક સીનમાં સહ-કલાકારે તેમને એટલી જોરથી લાફો માર્યો કે તેમની ડાબી આંખની નસ ફાટી ગઈ. તેમને ફેસિયલ પેરાલિસિસ (ચહેરાનો લકવો) થઈ ગયો અને 3 વર્ષ સુધી તેમની સારવાર ચાલી.
સાઇડ રોલ્સના સ્ટાર અને ગિનિસ વર્લ્ડ રેકોર્ડ
આ ઘટનામાંથી બહાર આવતા તેમને વર્ષો લાગી ગયા અને તેઓ લાંબો સમય એક્ટિંગથી દૂર રહ્યા. ડાબી આંખ ખરાબ થવાને કારણે તેમને ફિલ્મોમાં લીડ રોલ ન મળ્યા, પરંતુ સાઇડ રોલ્સમાં તેમણે એવો જીવ રેડ્યો કે તેઓ સ્ટાર બની ગયા. તેમણે 70 વર્ષની કારકિર્દીમાં લગભગ 700 ફિલ્મોમાં કામ કર્યું. લલિતા પવારે સૌથી લાંબા સમય સુધી એક્ટિંગ કરવા માટે ગિનિસ વર્લ્ડ રેકોર્ડમાં પોતાનું નામ નોંધાવ્યું હતું.
આ પણ વાંચો- Gujratના પૂર્વ CM આનંદીબેન પટેલની પૌત્રી સંસ્કૃતિ જયનાનું બોલીવુડ ડેબ્યૂ, આ ફિલ્મથી મચાવશે ધૂમ!
