જ્યારે પણ સત્તા અને સામ્રાજ્યની વાત આવે છે, ત્યારે હંમેશા પુરુષોને પ્રાથમિકતા આપવામાં આવે છે. બાહુબલીથી લઈને ધ લોર્ડ ઓફ ધ રિંગ્સ અને ધ ક્રોનિકલ્સ ઓફ નાર્નિયા જેવી અનેક ફિલ્મો છે, જ્યાં રાજ્યની ગાદી પર પુરુષોનું શાસન દર્શાવવામાં આવ્યું છે.
જોકે, હવે ઓટીટી પર એક એવી કાલ્પનિક પીરિયડ સિરીઝ ટ્રેન્ડ કરી રહી છે, જ્યાં છેલ્લા 800 વર્ષથી એક રાજ્ય પર માત્ર મહિલાઓનું રાજ છે અને એ સ્ત્રીઓ જ તે વિસ્તારનું ભવિષ્ય નક્કી કરે છે.
જે સિરીઝ વિશે અમે વાત કરી રહ્યા છીએ, તેમાં મહિલાઓનો મુંબઈ અંડરવર્લ્ડના ગેંગસ્ટર કરતાં પણ વધુ ખતરનાક અંદાજ જોવા મળે છે. સ્ટોરીની શરૂઆત અરબી સમુદ્ર અને પશ્ચિમ ઘાટની વચ્ચે વસેલા એક કાલ્પનિક રાજ્ય પેરનૂરુથી થાય છે, જ્યાં સદીઓ સુધી શાંતિ અને સુખ-સમૃદ્ધિનો માહોલ હતો. પરંતુ દક્ષિણમાં ભીષણ યુદ્ધ ફાટી નીકળતાં પેરનૂરુના રાજા અને તેમના તમામ યોદ્ધાઓને યુદ્ધના મેદાનમાં જવું પડ્યું હતું. જોકે, તેઓ ક્યારેય પાછા ન ફર્યા, જેના કારણે પેરનૂરુ રાજ્ય નબળું પડી ગયું હતું.
લાંબા સમય સુધી જ્યારે પુરુષો પાછા ન આવ્યા, ત્યારે રાજાની બહેનોએ પેરનૂરુના રક્ષણની જવાબદારી પોતાના ખભા પર ઉપાડી લીધી. તેમણે તમામ મહિલાઓને એકત્ર કરી અને પુરુષોનો સમગ્ર કારોબાર સંભાળી લીધો. પરંપરાગત યુદ્ધકળાથી લઈને વેપાર સુધીની દરેક બાબત તેમણે પોતાના હાથમાં લીધી. રાજ્ય પર હુમલો કરનારા દરેક શત્રુને તેમણે મોતને ઘાટ ઉતાર્યા. ત્યારબાદ તે રાજ્ય પર માત્ર મહિલાઓએ શાસન કર્યું અને તે અત્યંત સફળ રહ્યું. બહેનોએ રાજ્યને ત્રણ ભાગમાં વહેંચ્યું, જેથી એક નવા માતૃપ્રધાન સમાજની શરૂઆત થઈ. પેરનૂરુમાં આ સિંહાસન માતા દ્વારા પુત્રીને સોંપવામાં આવતું અને ગાદી પર બેસનારી શાસક અક્કા કહેવાતી.
બે બહેનોની અદાવત તેમજ સરકાર અને ગેંગસ્ટર બંનેથી પોતાના રાજ્યને બચાવવાની કહાણી પર બનેલી વેબ સિરીઝ અક્કા દર્શકોના દિલ જીતી રહી છે. 5 એપિસોડની આ વેબ સિરીઝ તાજેતરમાં રિલીઝ થઈ હતી અને જોતજોતામાં ઢીંઢોરા, રોડીઝ, ધ ગ્રેટ ઇન્ડિયન કપિલ શો અને ડેડ એન્ડ જોબ્સ જેવા શોને પછાડીને નેટફ્લિક્સ પર નંબર વન પર આવી ગઈ છે.
આશરે 30 મિનિટના એક એપિસોડવાળી અને યશરાજ ફિલ્મ્સના બેનર હેઠળ બનેલી આ સિરીઝનું નિર્દેશન ધર્મરાજ શેટ્ટીએ કર્યું છે. સિરીઝમાં સાઉથ એક્ટ્રેસ કીર્તિ સુરેશ અને રાધિકા આપ્ટે ઉપરાંત તન્વી આઝમી, મહેશ માંજરેકર અને અંશુમન પુષ્કર મહત્વની ભૂમિકાઓ ભજવી રહ્યા છે.