રામાયણની રિલીઝને હવે માત્ર 1 અઠવાડિયું બાકી છે, એવામાં આખી ટીમ જોરશોરથી ફિલ્મના પ્રમોશનમાં લાગેલી છે. 5 નવેમ્બરે રિલીઝ થવા જઈ રહેલી આ મોટા બજેટની ફિલ્મમાં રણબીર કપૂર ભગવાન શ્રીરામના રોલમાં અને સાઈ પલ્લવી માતા સીતાના રોલમાં જોવા મળશે. જ્યારે કન્નડ સુપરસ્ટાર યશ રાવણના રોલમાં અને સની દેઓલ હનુમાનજીના રોલમાં દેખાશે.
જીવનસાથીને લઈને સાઈ પલ્લવીનો ખુલાસો
આ દરમિયાન ફિલ્મના કલાકારો પ્રમોશન માટે કૌન બનેગા કરોડપતિ 18ના સેટ પર પહોંચ્યા હતા, જ્યાં અમિતાભ બચ્ચને રામાયણની ટીમ સાથે ફિલ્મ તેમજ તેમના અંગત જીવન સાથે જોડાયેલા હળવા-ફૂલકા સવાલો કર્યા હતા. આ દરમિયાન બિગ બીએ સાઈ પલ્લવીને તેના લગ્નને લઈને પણ સવાલ કર્યો હતો. તેમણે પૂછ્યું કે જો તે લગ્ન કરે તો પોતાના જીવનસાથીમાં કેવા ગુણો ઈચ્છે છે? સાઈએ આ સવાલનો જવાબ આપતાં કહ્યું કે તેમના માટે કોઈ વ્યક્તિનું સારો માણસ હોવું સૌથી વધુ જરૂરી છે. સાથે જ તેમણે અન્ય કેટલીક બાબતો પણ જણાવી હતી.
સાઈ પલ્લવી કેવો જીવનસાથી ઈચ્છે છે?
કૌન બનેગા કરોડપતિ 18ના સ્ટેજ પર અમિતાભ બચ્ચને સાઈ પલ્લવીને તેના જીવનસાથી વિશે પૂછ્યું કે, જો તમે ક્યારેય નક્કી કરો કે તમારે લગ્ન કરવા છે, તો તમે કેવા પ્રકારની વ્યક્તિને પસંદ કરશો?
https://www.instagram.com/reel/DfCHiBUxrhl/?utm_source=ig_web_copy_link&rpxt=NTc4MTIwNjQ2YQ==
જવાબમાં સાઈએ કહ્યું, પહેલાં તો તે સારો માણસ હોવો જોઈએ. તે બહુ સ્વાર્થી ન હોવો જોઈએ. એક એવો માણસ જે આત્મનિરીક્ષણ કરી શકે, પોતાની અંદર જોઈ શકે અને પોતાના કર્મોનું ધ્યાન રાખી શકે. તે સમજતો હોય કે તે જિંદગીમાં ક્યાં ઊભો છે. ભૂલો તો માણસથી થઈ શકે છે, પરંતુ તેને સુધારતાં આવડવું જોઈએ. તે એવું બોલવાવાળો ન હોવો જોઈએ કે તેણે આવું કર્યું, એટલે મેં પણ આવું કર્યું. મેં ખૂબ લાંબું લિસ્ટ બનાવી રાખ્યું છે. સૌથી જરૂરી એ છે કે સારો માણસ હોવો જોઈએ અને જો રસોઈ બનાવતાં આવડતી હોય તો સૌથી સારું.
ડોક્ટરથી કેવી રીતે બની એક્ટ્રેસ?
શો દરમિયાન અમિતાભ બચ્ચને સાઈ પલ્લવીને તેના અભ્યાસ અંગે પણ સવાલો કર્યા અને પૂછ્યું કે ડોક્ટરીના અભ્યાસ પછી તેણે એક્ટિંગને કરિયર તરીકે કેમ પસંદ કરી? આ વાત પર સાઈ પલ્લવીએ હસીને કહ્યું, ભગવાને જ નક્કી કર્યું હતું કે મારે એક્ટિંગ કરવી જોઈએ. સાઈનો જવાબ સાંભળીને બિગ બી થોડી મૂંઝવણમાં મુકાઈ ગયા, ત્યારે રણબીરે તરત જ કહ્યું, ભગવાનનું પ્રિસ્ક્રિપ્શન હતું સર કે તેમણે એક્ટિંગ કરવાની છે. રણબીરનો આ જવાબ સાંભળીને તમામ દર્શકો અને ખુદ બિગ બી પણ ખડખડાટ હસી પડ્યા હતા. સાઈ પલ્લવીએ જ્યોર્જિયાની ત્બિલિસી સ્ટેટ મેડિકલ યુનિવર્સિટીમાંથી મેડિકલનો અભ્યાસ કર્યો હતો, પરંતુ પછીથી તેણે એક્ટિંગની દુનિયા પસંદ કરી હતી.
https://www.instagram.com/p/DVr14cUkgGd/?utm_source=ig_web_copy_link&exln=MzRlODBiNWFlZA==&srtk=MzRlODBiNWFlZA==
રામાયણમાં માતા સીતા બની સાઈ પલ્લવી
સાઈ પલ્લવી હાલમાં ડિરેક્ટર નિતેશ તિવારીની ફિલ્મ રામાયણને લઈને ચર્ચામાં છે. આ ફિલ્મમાં સાઈ પલ્લવી માતા સીતાનો રોલ કરી રહી છે, જ્યારે રણબીર ભગવાન રામ અને રવિ દુબે લક્ષ્મણના રોલમાં જોવા મળશે. ફિલ્મમાં યશ રાવણ અને સની દેઓલ ભગવાન હનુમાનનો રોલ કરી રહ્યા છે. રામાયણ: પાર્ટ 1 દુનિયાભરના સિનેમાઘરોમાં 5 નવેમ્બર 2026ના રોજ રિલીઝ થવા જઈ રહી છે. 2 ભાગમાં બનેલી આ મોટા બજેટની ફિલ્મનો આ પહેલો ભાગ છે, જ્યારે બીજો ભાગ દિવાળી 2027માં રિલીઝ થઈ શકે છે.