સુનીલ ગ્રોવરે દિવાળીના દિવસે ફેન્સને ફરી ચોંકાવી દીધા છે. તેણે ઇન્સ્ટાગ્રામ પર એક ફોટો શેર કર્યો છે, જેમાં તે રોડ સાઈડ ફૂલો વેચતો જોવા મળે છે. શોર્ટ્સ અને સિમ્પલ ટી-શર્ટમાં સુનીલ રસ્તા કિનારે ફૂલો વેચતી કેટલીક છોકરીઓ વચ્ચે બેઠેલો દેખાય છે. તેણે પોતાના હાથમાં થોડાં ફૂલો અને દિવાળીના ડેકોરેશનની વસ્તુઓ પકડી રાખી છે. તો શું સુનીલ ગ્રોવરે સાચે જ ફૂલો વેચવાનું કામ શરૂ કરી દીધું છે?
ડાઉન ટુ અર્થ અંદાજથી ફરી જીતી લીધા દિલ
સુનીલ ગ્રોવરે રોડ સાઈડ જમીન પર બેસીને ફૂલો સાથે ફોટો શેર કરતાં લખ્યું, બધાને હેપ્પી દિવાળી. પ્રેમ અને રોશની તમારા જીવનમાં આવે. ફોટો જોઈને જેવું લાગે છે એવું નથી. સુનીલ ગ્રોવર પોતાના ડાઉન ટુ અર્થ સ્વભાવ માટે જ જાણીતો છે. તે અવારનવાર આવી સામાન્ય લોકો સાથે જોડાયેલી પળો માણતો રહે છે. હવે તેણે દિવાળી પર ફૂલ વેચનારા લોકો સાથે બેસીને ફોટો પડાવ્યો છે અને તેને ફેન્સ સાથે શેર કર્યો છે.
