મહારાષ્ટ્રમાં ફૂડ એન્ડ ડ્રગ એડમિનિસ્ટ્રેશન એટલે કે FDAએ બોલીવુડના મોટા કલાકારો સામે પણ કાર્યવાહી શરૂ કરી છે. FDAએ પાન મસાલા બનાવતી કંપની વિષ્ણુ એન્ડ કંપની ટ્રેડમાર્ક્સ પ્રાઇવેટ લિમિટેડની જાહેરાતને લઈને સુપરસ્ટાર શાહરુખ ખાન, અજય દેવગન અને ટાઇગર શ્રોફને નોટિસ મોકલી છે. FDAનું માનવું છે કે ગુટખાની જાહેરાત દ્વારા વિમલ પાન મસાલા બ્રાન્ડનો અલગ રીતે પ્રચાર કરવામાં આવી રહ્યો છે. નોટિસમાં કહેવામાં આવ્યું છે કે તેનાથી ગ્રાહકો ગેરમાર્ગે દોરાઈ શકે છે.
વર્ષોથી ગુટખાની જાહેરાતમાં જોવા મળે છે આ કલાકારો
શાહરુખ ખાન, અજય દેવગન અને ટાઇગર શ્રોફ ઘણા વર્ષોથી ગુટખાની જાહેરાતમાં જોવા મળી રહ્યા છે. બોલો જુબાં કેસરી નામની આ જાહેરાતે પણ ઘણી ચર્ચા જગાવી હતી. શરૂઆતમાં આ જાહેરાત માત્ર અજય દેવગન કરતા હતા, પરંતુ બાદમાં તેમાં શાહરુખ ખાન અને ટાઇગર શ્રોફને પણ જોડવામાં આવ્યા. અહેવાલો અનુસાર, શાહરુખ ખાન મોટા બ્રાન્ડની જાહેરાત માટે સામાન્ય રીતે એક દિવસ અથવા સમગ્ર કેમ્પેઇન માટે લગભગ 8 થી 12 કરોડ રૂપિયા ફી લે છે. જોકે, પાન મસાલા જેવા મોટા અને વિવાદાસ્પદ બ્રાન્ડના કેમ્પેઇન માટે તેમની ફી લગભગ 20 થી 30 કરોડ રૂપિયા સુધી હોઈ શકે છે.
અજય દેવગન કેટલી ફી લે છે?
અહેવાલો અનુસાર, અજય દેવગન વિમલ બ્રાન્ડના જૂના અને મુખ્ય ચહેરાઓમાંથી એક છે. અજય દેવગન આ બ્રાન્ડ માટે વર્ષના કરાર અથવા કેમ્પેઇનના આધારે લગભગ 10 થી 15 કરોડ રૂપિયા ફી લે છે. જોકે, આ જાહેરાત માટે તેમની ચોક્કસ ફી કેટલી છે તેની પાક્કી માહિતી ઉપલબ્ધ નથી.
ટાઇગર શ્રોફની ફી કેટલી છે?
ટાઇગર શ્રોફ કોઈ જાહેરાત માટે લગભગ 3 થી 5 કરોડ રૂપિયા ફી લે છે. આ આધારે આ કેમ્પેઇન માટે પણ તેમની ફી લગભગ 3 થી 5 કરોડ રૂપિયા હોવાનો અંદાજ છે. કલાકારોની ફીનો અંદાજ મીડિયા અહેવાલો અને ફિલ્મ ઈન્ડસ્ટ્રીના અનુમાનના આધારે લગાવવામાં આવે છે. સંદેશ ડિજિટલ ન્યૂઝ આ આંકડાની ચોકસાઈની પુષ્ટિ કરતું નથી. FDAએ ત્રણેય બોલીવુડ કલાકારોને આ પ્રોડક્ટ સાથેનો પોતાનો સંબંધ ખતમ કરવા અને સોશિયલ મીડિયા અકાઉન્ટ પરથી જાહેરાત સાથે જોડાયેલી પ્રમોશનલ પોસ્ટ્સ હટાવવા પણ કહ્યું છે.
મહારાષ્ટ્રમાં પાન મસાલા પર પ્રતિબંધ
મહારાષ્ટ્રમાં ગુટખા, પાન મસાલા, ફ્લેવર્ડ તમાકુ અને અન્ય કેટલાક તમાકુ ઉત્પાદનોનું ઉત્પાદન, સંગ્રહ, પરિવહન, વિતરણ અને વેચાણ કરવા પર પ્રતિબંધ છે. જુલાઈ 2012માં ફૂડ સેફ્ટી એન્ડ સ્ટાન્ડર્ડ્સ એક્ટ, 2006 હેઠળ આ પ્રતિબંધને વધુ કડક બનાવવામાં આવ્યો હતો. ત્યારબાદ જૂન 2026માં FDAના અધિકારીઓને કાયદાનો ભંગ કરનારા તમાકુ સપ્લાયરો સામે MCOCA હેઠળ કાર્યવાહી કરવાની પણ મંજૂરી આપવામાં આવી હતી.
આ પણ વાંચો-Shah Rukh Khan, અજય દેવગન અને ટાઈગર શ્રોફની વધી મુશ્કેલીઓ! ગુટખા એડને લઈને FDAની નોટિસ
