જાણીતી અભિનેત્રી અને ગાયિકા સપના ચૌધરીને દિલ્હીની એક અદાલતે ઘરેલુ હિંસાથી મહિલાઓના રક્ષણ કાયદા હેઠળ વચગાળાનો રક્ષણ આદેશ (Interim Protection Order) આપ્યો છે. દ્વારકા કોર્ટના જ્યુડિશિયલ મેજિસ્ટ્રેટ (મહિલા અદાલત) એ આ મામલે સુનાવણી હાથ ધરી સપનાના પતિ પર કડક પ્રતિબંધો લાદી દીધા છે. કોર્ટના આદેશ અનુસાર, આગામી સુનાવણી સુધી તેના પતિ સપનાનો કોઈ પણ પ્રકારે સંપર્ક કરી શકશે નહીં, તેમજ તેના ઘર, કાર્યસ્થળ કે ફિલ્મ પ્રીમિયરના સ્થળોએ જવા પર પણ રોક લગાવી દેવામાં આવી છે.
સપના ચૌધરી, પતિ હુમલા કરે તેવો ભય
સપના ચૌધરી વતી કોર્ટમાં હાજર રહેલા એડવોકેટ પ્રીતિ સિંહે દલીલ કરી હતી કે, પતિના ત્રાસદાયક વર્તનને કારણે સપના પોતાનું ઘર છોડવા મજબૂર થઈ હતી અને હાલમાં તે નવી દિલ્હીના નજફગઢ ખાતે તેના માતા-પિતાના ઘરે રહે છે. વકીલે તાત્કાલિક સુરક્ષાની માંગ કરતા જણાવ્યું હતું કે, ૧૦ જૂન, ૨૦૨૬ના રોજ સપનાની ફિલ્મ "મોમાકુ" નું પ્રીમિયર યોજાવાનું છે. સપનાને ભય છે કે તેનો પતિ આ જાહેર સ્થળે આવીને તેને ધમકી આપી શકે છે, તેના પર હુમલો કરી શકે છે અથવા હોબાળો મચાવીને તેની પ્રતિષ્ઠાને નુકસાન પહોંચાડી શકે છે. તેથી સપનાની સુરક્ષા માટે આ વચગાળાનો આદેશ અત્યંત જરૂરી હતો.
