બોલીવુડના સલમાન ખાન ગઈકાલે મુંબઈમાં વર્લ્ડ પેડલ લીગ (WPL)ના સીઝન 3ના ઉદ્ઘાટન સમારોહમાં જોવા મળ્યા હતા. આ દરમિયાન અભિનેતાએ પોતાના નાના ભાઈ સોહેલ ખાનને સપોર્ટ કર્યો હતો. સોહેલ ખાન નવી ટીમ ખાન ટાઈગર્સનો માલિક છે. ટેનિસ સ્ટાર મહેશ ભૂપતિ દ્વારા સહ-સ્થાપિત આ લીગ 12થી 16 ઓગસ્ટ દરમિયાન મુંબઈના ગોરેગાંવ સ્થિત નેસ્કો સેન્ટર ખાતે યોજાશે. આ કાર્યક્રમ દરમિયાન સલમાનને પૂછવામાં આવ્યું કે શું તેણે ક્યારેય ઈન્ડિયન પ્રીમિયર લીગ (IPL)માં ટીમ ખરીદવાનું વિચાર્યું છે? તેના પર ભાઈજાને ચોંકાવનારો જવાબ આપ્યો હતો.
શું સલમાન ખાને IPL ટીમ ખરીદવાનું વિચાર્યું?
ભાઈજાને IPL ટીમ ખરીદવાના સવાલ પર એક રમૂજી જવાબ આપ્યો હતો જે હાલ સોશિયલ મીડિયામાં વાયરલ થઈ રહ્યો છે. અભિનેતાએ કહ્યું હતું કે, 'અમે હવે IPL માટે ખૂબ જ વૃદ્ધ છીએ, અમને ઘણા સમય પહેલા એક ટીમ ઓફર કરવામાં આવી હતી પરંતુ અમે તે સ્વીકારી ન હતી અને એવું નથી કે અમને તે નિર્ણયનો અફસોસ છે. અમે ISPLથી ખૂબ ખુશ છીએ. આ અમારી શૈલી છે, ટેનિસ બોલ ક્રિકેટ... ગલી ક્રિકેટ... મોટી લીગ હકીકતમાં અમારા માટે નથી અમે અહીં વધુ સારા છીએ.'
સોહેલ ખાન શું બોલ્યા?
ખાન ટાઈગર્સ સાથે પેડલ સ્પોર્ટ્સની દુનિયામાં પ્રવેશ કરી રહેલા સોહેલ ખાને લીગના ભવિષ્ય વિશે મોટી આશા વ્યક્ત કરી હતી. તેમણે કહ્યું હતું કે, 'હું ખરેખર ઇચ્છું છું કે આ લીગ એક દિવસ IPL જેટલી મોટી બને પરંતુ જ્યાં સુધી ભારતીય ખેલાડીઓ પેડલ રમવાનું શરૂ ન કરે ત્યાં સુધી આ બનશે નહીં. તેને વિકસાવવાનો આ એકમાત્ર રસ્તો છે. તે બધું મીડિયા તેનો કેટલો પ્રચાર કરે છે અને બાળકો તેને અપનાવવાનું શરૂ કરે છે કે નહીં તેના પર નિર્ભર છે.' સલમાન ખાનના વર્ક ફ્રન્ટ વિશે વાત કરીએ તો, સુપરસ્ટારની છેલ્લી રિલીઝ થયેલી ફિલ્મ સિકંદર હતી. આ ફિલ્મ બોક્સ ઓફિસ પર કોઈ ખાસ કમાલ કરી શકી નહીં. હવે સલમાન ખાન વોર ડ્રામા બેટલ ઓફ ગલવાનમાં જોવા મળશે. હાલમાં અભિનેત્રી ફિલ્મના શૂટિંગમાં વ્યસ્ત છે.
