યૂટ્યૂબની દુનિયામાં દરરોજ હજારો ગીતો અપલોડ થાય છે, પરંતુ તેમાંથી અમુક જ એવા હોય છે જે ઇતિહાસ રચે છે. એક આવું જ સિમ્પલ અને બાળકો જેવું દેખાતું ગીત આજે દુનિયાનો સૌથી વધુ જોવાયેલો વીડિયો બની ચૂક્યું છે. આ ગીતને 16 બિલિયનથી વધુ વખત જોવામાં આવ્યું છે, જે પોતે જ એક ચોંકાવનારો આંકડો છે. સરળ શબ્દો, વારંવાર પુનરાવર્તિત થતી ધૂન અને રંગબેરંગી એનિમેશનને કારણે આ ગીત બાળકોની જીભે ચઢી ગયું છે.
બેબી શાર્ક (Baby Shark)
યૂટ્યૂબ પર સૌથી વધુ વ્યૂઝ ધરાવતો વીડિયો જો સર્ચ કરવામાં આવે તો જે ગીત સામે આવશે તેને જોઈને કોઈપણ હેરાન રહી જશે. જે ગીતની વાત કરવામાં આવી રહી છે તે છે બેબી શાર્ક (Baby Shark). જેમના ઘરમાં બાળકો છે, તેમને આ ગીત વિશે સારી રીતે ખબર હશે. જોકે, જ્યાં લોકો જાણે છે કે આ ગીત બાળકોના મનોરંજન માટે વગાડવામાં આવે છે, તો બીજી તરફ 3 વર્ષ પહેલા આ ગીતનો ઉપયોગ કેદીઓને સજા આપવા માટે પણ કરવામાં આવ્યો હતો.
યૂટ્યૂબ પર સૌથી વધુ વ્યૂઝ ધરાવતું ગીત
ગીતની શરૂઆત વિશે વાત કરીએ તો, આ ગીતની શરૂઆત એક પરંપરાગત બાળકોની ધૂનથી માનવામાં આવે છે, જેને અલગ-અલગ દેશોમાં અલગ અંદાજમાં ગાવામાં આવતું હતું. બાદમાં તેને એનિમેશન સાથે નવી રીતે રજૂ કરવામાં આવ્યું. વીડિયોમાં ચમકદાર રંગો, સિમ્પલ ડાન્સ મૂવ્સ અને વારંવાર પુનરાવર્તિત થતા શબ્દોએ તેને ખૂબ જ આકર્ષક બનાવી દીધું. ખાસ કરીને નાના બાળકો માટે આ ગીત તરત જ યાદ રહી જાય તેવું હતું, આ જ કારણ રહ્યું કે શાળાઓ, ડે-કેર, ઘરો અને બાળકોની પાર્ટીઓમાં તે સતત વાગવા લાગ્યું.
પરંપરાગત ધૂનથી ગ્લોબલ હિટ સુધીની સફર
ઘણા અહેવાલોમાં જણાવાયું છે કે બેબી શાર્ક ગીતના અનેક વર્ઝન બનાવવામાં આવ્યા છે અને તેના ઓરિજિનલ ગીતના રાઈટ્સ માટે પણ ઘણા લોકો સામે આવ્યા હતા. પરંતુ, યૂટ્યૂબની વાત કરીએ તો, જે ગીતને સૌથી વધુ વ્યૂઝ મળ્યા છે તે વર્ષ 2016માં દક્ષિણ કોરિયાની બાળકોની એન્ટરટેઈનમેન્ટ કંપની પિંકફોંગ (Pinkfong) ની ચેનલ પરથી અપલોડ કરવામાં આવ્યું હતું. અનેક વર્ઝન હોવા છતાં પિંકફોંગના વર્ઝનને લોકોએ વધુ પસંદ કર્યું કારણ કે તેના બોલ ખૂબ જ સરળ છે.
2016માં રિલીઝ અને પિંકફોંગનો જાદુ
પિંકફોંગની ચેનલ પર રહેલા બેબી શાર્ક ગીતને અત્યાર સુધીમાં 16 બિલિયન એટલે કે 1600 કરોડ વ્યૂઝ મળી ચૂક્યા છે, જે પોતાનામાં જ એક રેકોર્ડ છે. ધીરે ધીરે સોશિયલ મીડિયા પ્લેટફોર્મ પર તેની ચેલેન્જ, રિમિક્સ અને કવર વીડિયો બનવા લાગ્યા અને જોતજોતામાં આ ગીત ગ્લોબલ ફેનોમેનન બની ગયું. બીજી તરફ, આ ગીતને સજા તરીકે વાપરવાની વાત કરીએ તો, અહેવાલ મુજબ વર્ષ 2023માં ઓક્લાહોમાના બે જેલ અધિકારીઓને બે વર્ષની પ્રોબેશન સજા આપવામાં આવી હતી.
1600 કરોડ વ્યૂઝ અને જેલમાં સજા તરીકે ઉપયોગ
બંને જેલ અધિકારીઓ પર આરોપ હતો કે તેમણે કેદીઓ સાથે ખૂબ જ ખરાબ વર્તન કર્યું હતું, જેમાં તેઓ બેબી શાર્ક ગીતને લૂપ પર કલાકો સુધી વગાડતા હતા. આ ગીત કોરિયન-અમેરિકન હોપ સેગોઈને ગાયું છે, જે તે સમયે માત્ર 10 વર્ષની જ હતી. આ ગીતની સૌથી મોટી તાકાત તેનું પુનરાવર્તન માનવામાં આવે છે. નાના વાક્યો અને આકર્ષક સંગીત તેને મગજમાં બેસાડી દે છે. ઘણા લોકોએ તેને ઈયરવર્મ પણ કહ્યું છે, એટલે કે એવું ગીત જે એકવાર સાંભળ્યા પછી મગજમાંથી નીકળતું જ નથી.
આ પણ વાંચો- Legendary Singer : ક્યારેય નહીં સાંભળવા મળે અલ્કા યાજ્ઞિકનો અવાજ? ગંભીર બીમારી સામે લડી રહી છે ગાયિકા!
