- કપલના લગ્ન ઉદયપુરના લીલા પેલેસમાં થશે
- પ્રી-વેડિંગ ફંક્શન 23 સપ્ટેમ્બરથી શરૂ થશે
- આ ફંક્શનમાં 200 લોકો સામેલ થવાની શક્યતાઓ
બોલિવૂડ અભિનેત્રી પરિણીતી ચોપરા અને રાઘવ ચઢ્ઢાએ 13 મેના રોજ દિલ્હીમાં સગાઈ કરી હતી. ત્યારથી ચર્ચા હતી કે બંને આ વર્ષે લગ્ન કરશે કે આવતા વર્ષે. અત્યાર સુધી જે વાતની રાહ જોવાતી હતી તેનો અંત આવ્યો છે. તેમના લગ્નની તારીખ અને સ્થળ જાહેર થઈ ગયું છે. પરિણીતી અને રાઘવ 25 સપ્ટેમ્બરે લગ્ન કરવા જઈ રહ્યા છે. બંનેના લગ્ન ઉદયપુરના લીલા પેલેસમાં થશે. હવે લગ્નની તમામ વિગતો સામે આવી ચૂકી છે.
મહેમાનો માટે ઓબેરોય હોટેલમાં રહેવાની વ્યવસ્થા કરાશે
લગ્નની વાત કરીએ તો પરિણીતી ચોપરા અને રાઘવ ચઢ્ઢાના લગ્ન 25 સપ્ટેમ્બરના રોજ નક્કી કરવામાં આવ્યા છે અને પ્રી-વેડિંગ ફંક્શન 23 સપ્ટેમ્બરથી શરૂ થશે. લગ્ન સ્થળ રાજસ્થાનના ઉદયપુરમાં લીલા પેલેસ તરીકે રાખવામાં આવ્યું છે. આ ફંક્શનમાં 200 લોકો સામેલ થવાના સમાચાર છે. મોટાભાગના મહેમાનોને ઓબેરોય હોટેલમાં રહેવાની વ્યવસ્થા કરવામાં આવશે. હાલમાં તેમના લગ્નની આ મહત્વપૂર્ણ વિગતો પ્રકાશમાં આવી છે, આ ચાહકો માટે એક સારા સમાચાર છે.
દિલ્હીના કપૂરથલામાં થઈ હતી સગાઈ
વર્ષની શરૂઆતમાં જ્યારથી પરિણીતી અને રાઘવ એક સાથે જોવા મળ્યા હતા ત્યારથી અફવાઓ ફેલાઈ હતી કે બંને વચ્ચે કંઈક ચાલી રહ્યું છે. આ પછી તે દિવસ પણ આવ્યો જ્યારે કપલે તેમના સંબંધોને સત્તાવાર બનાવ્યા અને તેમની સગાઈની જાહેરાત કરી. બંનેની સગાઈનો રંગારંગ સમારોહ દિલ્હીના કપૂરથલા હાઉસમાં યોજાયો હતો. આ દરમિયાન માત્ર પરિવાર અને નજીકના લોકોએ જ ભાગ લીધો હતો. પરિણીતીની બહેન પ્રિયંકા ચોપરાએ સગાઈમાં હાજરી આપી હતી પરંતુ નિક જોનાસ કાર્યક્રમનો ભાગ બની શક્યો નહોતો. પરંતુ અપેક્ષા છે કે નિક જોનાસ લગ્નમાં હાજરી આપશે. બાકીના મહેમાનો અંગે હજુ સુધી ઘણી વિગતો બહાર આવી નથી.
