Ahmedabad: કુખ્યાત મોન્ટુ નામદાર ઉદયપુરથી પકડાયો, પોલીસને ચકમો આપીને થયો હતો ફરાર

• અમદાવાદ ગ્રામ્ય પોલીસે ઉદયપુરથી મોન્ટુ નામદારને દબોચ્યો
  
• મોન્ટુ નામદાર પોલીસને ચકમો આપીને ફરાર થઈ ગયો હતો
• આ કેસમાં એક PI અને બે કોન્સ્ટેબલને સસ્પેન્ડ કરાયા હતા

અમદાવાદનો કુખ્યાત ગુનેગાર મોન્ટુ નામદાર પોલીસ જાપતામાંથી ફરાર થવા મામલે મોટું અપડેટ સામે આવ્યું છે. અમદાવાદ ગ્રામ્ય LCB અને SOGની ટીમે ઉદયપુરથી મોન્ટુ નામદારને દબોચી લીધો હતો. ભાજપના કાર્યકર્તાની હત્યા કરવાના કેસમાં નડિયાદની બિલોદર જેલમાં સજા કાપી રહ્યો હતો. અમદાવાદ કોર્ટ માંથી પરત જતાં સમયે અસલાલી સર્કલ પાસેથી આરોપી પોલીસને ચકમો આપીને ફરાર થઈ ગયો હતો. આ કેસમાં એક પીએસઆઈ અને બે કોન્સ્ટેબલને સસ્પેન્ડ કરાયા હતા.

જાણો શું છે સમગ્ર મામલો

મળતી માહિતી મુજબ ખાડિયામાં બીજેપીના કાર્યકરની હત્યા સહિતના અનેક ગુનાઓમાં સંડોવાયેલા મોન્ટુ નામદારને અમદાવાદની સેશન્સ કોર્ટમાં મુદ્દત માટે લાવવામાં આવ્યો હતો. તેને પરત લઇ જતા સમયે પોલીસને અસલાલી સર્કલ પાસે તે બાથરૂમ જવાનું બહાનું બતાવીને ફરાર થઇ ગયો હોવાની ફરિયાદ નડિયાદ પોલીસ જાપ્તાના પીએસઆઇ બી ડી પરમારે નોંધાવી હતી. અસલાલી સર્કલ પાસેના સીસીટીવી ફુટેજ અને તમામ સ્ટાફના મોબાઇલ લોકેશન તપાસ કરવામાં આવતા કેટલાંક અલગ લોકેશન મળી આવ્યા હતા.

મોન્ટુ નામદાર સામે કુલ 23 જેટલા ગુનાઓ નોંધાયેલા

નોંધનીય છે કે, આરોપી પોલીસથી બચવા માટે ટેકનોલોજીનો પણ ઉપયોગ કરતો હતો. મોબાઈલનું લોકેશનના મળે તે માટે કીપેડ મોબાઇલ યુઝ કરતો હતો અને દર બીજા દિવસે સીમકાર્ડ તોડી અને નવા સીમકાર્ડનો ઉપયોગ કરતો હતો. આ સાથે પોતાની કાર ટોલટેક્સ નજીકના દેખાય તે માટે અલગ અલગ ફાસ્ટ ટ્રેકનો પણ ઉપયોગ કરી ટોલટેક્સ ક્રોસ કરતો હતો. વિગતે વાત કરવામાં આવે તો, મોન્ટુ નામદાર સામે કુલ 23 જેટલા ગુનાઓ નોંધાયેલા છે જેમાં જુગારના 15 હથિયાર સંબંધિત 2 અને મારામારીના 6 ગુનાઓ નોંધાયેલા છે.