ગુજરાતમાંથી એક અત્યંત સંવેદનશીલ અને ચકચારી સમાચાર સામે આવ્યા છે, જ્યાં ગુજરાત હાઈકોર્ટને બોમ્બથી ઉડાવી દેવાની ગંભીર ધમકી આપવામાં આવી છે. આ ધમકી મળતાની સાથે જ રાજ્યના સુરક્ષા વર્તુળો અને પોલીસ પ્રશાસનમાં દોડધામ મચી ગઈ હતી. એજન્સીઓ દ્વારા તાત્કાલિક ધોરણે હાઈકોર્ટ પરિસરમાં સુરક્ષા બમણી કરી દેવામાં આવી છે અને ડોગ સ્ક્વોડ તેમજ બોમ્બ ડિસ્પોઝલ સ્ક્વોડની ટીમો ઘટનાસ્થળે પહોંચીને સઘન ચેકિંગ અને સર્ચ ઓપરેશન શરૂ કરી દીધું છે.
ઈમેલ મારફતે બ્લાસ્ટ કરવાની ધમકી
પ્રાપ્ત વિગતો મુજબ, આ ધમકી કોઈ પત્ર કે ફોન દ્વારા નહીં પરંતુ ઈમેલ (Email) મારફતે મોકલવામાં આવી હતી. આ ધમકીભર્યા ઈમેલમાં 'ખાલિસ્તાન નેશનલ આર્મી' નામના સંગઠનનો ઉલ્લેખ કરવામાં આવ્યો છે અને બપોરે 1:11 વાગ્યે બ્લાસ્ટ કરીને તારાજી સર્જવાની ધમકી આપવામાં આવી હતી. આ અતિ સંવેદનશીલ મામલે સાયબર ક્રાઈમ અને ગુપ્તચર એજન્સીઓ (IB/RAW) સક્રિય થઈ ગઈ છે અને આ ઈમેલ કયા લોકેશનથી અને કોણે મોકલ્યો છે તેની કુંડળી કાઢવા માટે ટેક્નિકલ સર્વેલન્સ હાથ ધરવામાં આવ્યું છે.
પોલીસ દ્વારા તપાસ તેજ
આ ધમકી માત્ર ગુજરાત હાઈકોર્ટ પૂરતી સીમિત ન હતી, પરંતુ મોકલવામાં આવેલા આ ઈમેલમાં ઉત્તર પ્રદેશના પવિત્ર અને ધાર્મિક કેન્દ્રો એવા અયોધ્યા, કાશી અને મથુરાનાં પ્રખ્યાત મંદિરોને પણ નિશાન બનાવવાનો ઉલ્લેખ કરવામાં આવ્યો છે. આ ખુલાસા બાદ સુરક્ષા એજન્સીઓ વધુ સતર્ક બની ગઈ છે અને સંવેદનશીલ સ્થળો પર પોલીસ કાફલો તૈનાત કરી દેવાયો છે. વહીવટી તંત્ર દ્વારા નાગરિકોને અફવાઓથી દૂર રહેવા અને શાંતિ જાળવવા માટે અપીલ કરવામાં આવી છે, જ્યારે બીજી તરફ પોલીસ આ ધમકી આપનાર આરોપીઓને ઝડપી પાડવા માટે ચક્રો ગતિમાન કર્યા છે.