સુરત શહેરમાં બદલાતી મોસમ અને રોગચાળાએ માસૂમ બાળકોને પોતાના સકંજામાં લેવાનું શરૂ કરી દીધું છે. તાજેતરમાં સુરતના અડાજણ વિસ્તારમાંથી એક અત્યંત હ્રદયદ્રાવક ઘટના સામે આવી છે, જ્યાં માત્ર 5 મહિનાની નાની બાળકીનું તાવ આવ્યા બાદ શંકાસ્પદ સંજોગોમાં મોત નીપજ્યું છે. પ્રાપ્ત વિગતો મુજબ, મૃતક બાળકીનું નામ રિયા કુમારી હતું અને તેને છેલ્લા ત્રણ દિવસથી સતત તાવ આવી રહ્યો હતો. નાની વયના બાળકીને અચાનક આ રીતે તાવ આવતા પરિવારજનો ચિંતામાં મુકાયા હતા અને તાત્કાલિક સારવાર શરૂ કરાવવી પડી હતી.

સ્થાનિક દવાખાનામાં ચાલતી હતી સારવાર

પરિવારજનો દ્વારા બાળકીની સારવાર માટે ઘર નજીક આવેલા જ એક સ્થાનિક દવાખાનામાં ડૉક્ટર પાસે દવા અપાવવામાં આવી રહી હતી. જોકે, દવા આપ્યા છતાં બાળકીની તબિયતમાં કોઈ સુધારો થયો ન હતો અને દિવસરાત તાવ રહેવાને કારણે બાળકીની તબિયત વધુ કથળી ગઈ હતી. સ્થિતિ ગંભીર જણાતા પરિવારજનો તાત્કાલિક ધોરણે બાળકીને વધુ સારવાર અર્થે સુરતની સિવિલ હોસ્પિટલ ખાતે ખસેડી રહ્યા હતા. પરંતુ, હોસ્પિટલ પહોંચે તે પહેલા જ રસ્તામાં અથવા હોસ્પિટલ પહોંચતાની સાથે જ ફરજ પરના તબીબોએ બાળકીને ચકાસીને મૃત જાહેર કરી હતી.

સ્થાનીકોમાં ભારે રોષ

પરિવારજનોના જણાવ્યા અનુસાર, 5 મહિનાની આ માસૂમ બાળકીને અગાઉથી કોઈપણ પ્રકારની ગંભીર બીમારી કે સ્વાસ્થ્ય સમસ્યા ન હતી. તંદુરસ્ત બાળકીને અચાનક સામાન્ય તાવ આવ્યાના માત્ર ત્રણ જ દિવસમાં મોત નીપજતા પરિવાર પર દુઃખનો ડુંગર તૂટી પડ્યો છે અને તેઓ શોકમાં ગરકાવ થઈ ગયા છે. શહેરમાં વધી રહેલા વાયરલ ઇન્ફેક્શન અને રોગચાળાના કારણે નાગરિકોમાં પણ ભારે ફફડાટ અને રોષ જોવા મળી રહ્યો છે, ત્યારે આરોગ્ય તંત્ર દ્વારા તાત્કાલિક ધોરણે યોગ્ય પગલાં લેવામાં આવે તેવી પ્રબળ માંગ ઉઠી રહી છે.

આ પણ વાંચો : Mahisagar જિલ્લામાં ગ્રામ પંચાયતની ચૂંટણીને લઈ મોટા સમાચાર, 262 ગ્રામ પંચાયતોની સીટો જાહેર