જામનગર, વડોદરા અને સુરત શહેરમાંથી આજે એક અત્યંત ચોંકાવનારા અને સરકારી તંત્રની ઊંઘ ઉડાડી દે તેવા સમાચાર સામે આવ્યા છે. જામનગર વડોદરા અને સુરત મહાનગરપાલિકાની કચેરીને બોમ્બથી ઉડાવી દેવાની એક અનામી ઈમેલ દ્વારા ધમકી મળતા સમગ્ર સરકારી આલમ અને સ્થાનિક પંથકમાં ભારે દોડધામ અને ફફડાટ વ્યાપી ગયો છે. ઘટનાની ગંભીરતાને જોતાં જ સુરક્ષા એજન્સીઓ તાત્કાલિક એક્શન મોડમાં આવી ગઈ છે.
પોલીસ કંટ્રોલ રૂમને જાણ કરી
મળતી પ્રાથમિક વિગતો અનુસાર, ઈમેલ આઈડી પર એક ધમકીભર્યો મેઈલ આવ્યો હતો, જેમાં મનપાના બિલ્ડિંગમાં બોમ્બ હોવાનો અને તેને બ્લાસ્ટ કરવાનો દાવો કરવામાં આવ્યો હતો. આ ચોંકાવનારો ઈમેલ જોતાં જ મનપાના ઉચ્ચ અધિકારીઓના હોશ ઊડી ગયા હતા અને તેમણે તાત્કાલિક ધોરણે પોલીસ કંટ્રોલ રૂમને આ અંગે જાણ કરી હતી.
બોમ્બ ડિસ્પોઝલ સ્ક્વોડ અને ડોગ સ્ક્વોડની મદદ
ધમકીના પગલે પોલીસની ટીમો તાત્કાલિક ઘટનાસ્થળે દોડી ગઈ હતી. આ સાથે જ બોમ્બ ડિસ્પોઝલ સ્ક્વોડ અને ડોગ સ્ક્વોડની મદદ લેવામાં આવી છે. સુરક્ષાના ભાગરૂપે મનપા બિલ્ડિંગના તમામ વિભાગો, પાર્કિંગ એરિયા અને આસપાસના પરિસરમાં સઘન ચેકિંગ અને સર્ચ ઓપરેશન હાથ ધરવામાં આવ્યું છે.
અફરાતફરીનો માહોલ
કચેરીમાં હાજર કર્મચારીઓ અને મુલાકાતીઓમાં ક્ષણિક માટે ભારે અફરાતફરીનો માહોલ સર્જાયો હતો, પરંતુ પોલીસે પરિસ્થિતિ પર કાબૂ મેળવીને શાંતિપૂર્વક તપાસ શરૂ રાખી છે. હાલમાં આ ધમકીભર્યો ઈમેલ ક્યાંથી આવ્યો, કોણે મોકલ્યો અને તેનો હેતુ શું હતો તે અંગે સાયબર ક્રાઈમની ટીમ પણ સક્રિય થઈ ગઈ છે. પોલીસે આ મામલે ગુનો નોંધીને તપાસનો ધમધમાટ તેજ કર્યો છે.
