રાજકોટના ઔદ્યોગિક વિસ્તાર ગણાતા શાપર-વેરાવળમાં મોડી રાત્રે કાળજું કંપાવી દેનારી લૂંટની મોટી ઘટના સામે આવી છે. અહીં ત્રાટકેલા હથિયારધારી લૂંટારુઓ પરિવારના વૃદ્ધને બંધક બનાવીને કરોડો રૂપિયાની લૂંટ ચલાવી સમગ્ર જિલ્લા પોલીસ તંત્રને દોડતું કરી દીધું છે. પ્રાથમિક વિગતો મુજબ, આ હિંસક લૂંટની ઘટના રાત્રિના આશરે 1 વાગ્યાની આસપાસ બની હતી, જ્યારે આખો વિસ્તાર ગાઢ નિંદ્રામાં હતો.
5 થી 7 જેટલા બુકાનીધારી શખ્સો ઘરમાં હથિયારો સાથે ધસી આવ્યા
શાપર-વેરાવળ વિસ્તારમાં રહેતા અને ખેતી, પેટ્રોલ પંપ તેમજ પ્લોટિંગના મોટા વ્યવસાય સાથે સંકળાયેલા જાણીતા જાડેજા પરિવારના મોભી જીતેન્દ્રસિંહ જાડેજાને નિશાન બનાવવામાં આવ્યા હતા. આશરે 5 થી 7 જેટલા બુકાનીધારી શખ્સો ઘરમાં હથિયારો સાથે ધસી આવ્યા હતા અને વૃદ્ધ જીતેન્દ્રસિંહને બંધક બનાવી લીધા હતા.
2.47 કરોડની રોકડ રકમ તેમજ 5 થી 7 તોલા સોનાના દાગીના સહિત કરોડોની મતાની લૂંટ
લૂંટારુઓએ ઘરમાંથી તિજોરીના તાળાં તોડી અંદાજે રૂપિયા 2.47 કરોડની રોકડ રકમ તેમજ 5 થી 7 તોલા સોનાના દાગીના સહિત કરોડોની મતાની લૂંટ ચલાવી રાતના અંધારામાં ફરાર થઈ ગયા હતા.
ઉચ્ચ પોલીસ અધિકારીઓનો કાફલો ઘટનાસ્થળે
ઘટનાની જાણ થતાં જ રાજકોટ ગ્રામ્ય એસપી સહિતના ઉચ્ચ પોલીસ અધિકારીઓનો કાફલો તાબડતોબ ઘટનાસ્થળે દોડી ગયો હતો. લૂંટની રકમ મોટી હોવાથી પોલીસે મામલાની ગંભીરતા જોઈને ગુનેગારોને દબોચી લેવા માટે અલગ-અલગ જુદી-જુદી ટીમો બનાવી આખા વિસ્તારમાં નાકાબંધી કરી દીધી છે.
સત્તાવાર ફરિયાદ નોંધવાની તજવીજ
હાલ શાપર-વેરાવળ પોલીસ સ્ટેશન ખાતે સત્તાવાર ફરિયાદ નોંધવાની તજવીજ ચાલી રહી છે. પોલીસે આસપાસના તમામ સીસીટીવી ફૂટેજ મેળવીને શંકાસ્પદ હિલચાલના આધારે તપાસ તેજ કરી છે. રાજકોટમાં મોડી રાત્રે બનેલી આ ઘટનાથી સ્થાનિક વેપારીઓ અને ઉદ્યોગપતિઓમાં ભારે ફફડાટ વ્યાપી ગયો છે.
