: સુરત મહાનગરપાલિકા દ્વારા દર વર્ષે ચોમાસા પૂર્વે કરોડો રૂપિયાના ખર્ચે રોડ રિપેરિંગ અને ડ્રેનેજ સફાઈના દાવા કરવામાં આવે છે, પરંતુ ચાલુ વર્ષે ચોમાસાના પ્રથમ રાઉન્ડમાં જ પાલિકાની પ્રી-મોન્સૂન કામગીરીના ધજાગરા ઉડી ગયા છે. શહેરમાં પડેલા પ્રારંભિક વરસાદને કારણે જ તમામ મુખ્ય માર્ગો પાણી-પાણી થઈ ગયા છે. એટલું જ નહીં, રસ્તા બનાવવાની નબળી ગુણવત્તાના કારણે શહેરના જુદા જુદા વિસ્તારોમાં ચાલુ ટ્રાફિકે રોડ બેસી જવાની ગંભીર ઘટનાઓ સામે આવી રહી છે, જેને પગલે પ્રજાના જીવ જોખમમાં મુકાયા છે.
પાંડેસરા બાદ હવે પાલમાં BRTS બસ ખૂંપી
શહેરમાં રોડ બેસી જવાની અને જાહેર પરિવહનની બસો ફસાવાની ઘટનાઓ અટકવાનું નામ નથી લઈ રહી. થોડા સમય પહેલા પાંડેસરા વિસ્તારમાં આ પ્રકારની ઘટના બન્યા બાદ, આજે શહેરના પોશ ગણાતા પાલ વિસ્તારમાં આવી જ એક મોટી દુર્ઘટના સર્જાઈ હતી. પાલ રોડ પરથી મુસાફરો ભરીને પસાર થઈ રહેલી બીઆરટીએસ (BRTS) બસ જ્યારે લાઇન પરથી જઈ રહી હતી, ત્યારે અચાનક રોડનો એક મોટો હિસ્સો જમીનમાં ધસી પડ્યો હતો. રસ્તો બેસી જતાં પળવારમાં આખી બસ ખાડામાં ગરકાવ થઈ ગઈ હતી અને એક તરફ નમી પડી હતી.
અચાનક રોડ બેસી જતા બસ ફસાઈ
અચાનક રોડ બેસી જતા બસ ફસાઈ
તંત્રના ભ્રષ્ટાચાર સામે જનતાનો આક્રોશ
બસ અચાનક જમીનમાં ધસી જતાં અંદર બેઠેલા મુસાફરોમાં ભારે ચીસાચીસ અને નાસભાગ મચી ગઈ હતી. જોકે, સદનસીબે બસ પલટી ન ખાતા અંદર સવાર તમામ નાગરિકોનો આબાદ બચાવ થયો છે અને કોઈ જાનહાનિ થઈ નથી. સ્થાનિક લોકોનો આક્ષેપ છે કે કોન્ટ્રાક્ટરો અને મનપાના અધિકારીઓની મિલીભગતને કારણે રસ્તાઓ બનાવવામાં વ્યાપક ભ્રષ્ટાચાર થાય છે, જેના લીધે પહેલા જ વરસાદમાં રસ્તાઓ ધોવાઈ જાય છે અને બસો ફસાઈ જાય છે. હાલમાં સોશિયલ મીડિયા પર આ ફસાયેલી બસોના ડિજિટલ વીડિયો વાયરલ થતાં સુરત પાલિકાની કામગીરી પર ગંભીર સવાલો ઉભા થયા છે.
પ્રી-મોન્સૂન કામગીરી પાછળ કરોડોનો ખર્ચ
સુરત મહાનગરપાલિકા દ્વારા ચોમાસા પહેલા સમગ્ર શહેરમાં પ્રી-મોન્સૂન કામગીરી પાછળ કરોડો રૂપિયાના અંદાજપત્રો મંજૂર કરવામાં આવે છે. પરંતુ વાસ્તવિક ગ્રાઉન્ડ રિપોર્ટ એ છે કે આ બજેટ માત્ર કાગળ પર જ રહ્યું છે. સુરતના ઔદ્યોગિક વિસ્તાર ગણાતા પાંડેસરામાં મનપા તંત્ર અને કોન્ટ્રાક્ટરોના નબળા મટીરિયલના વપરાશની જીવતી-જાગતી પોલ ખુલી ગઈ છે. પાંડેસરાના એક મુખ્ય માર્ગ પર, જે હજુ થોડા સમય પહેલા જ જનતા માટે નવો તૈયાર કરવામાં આવ્યો હતો, તે સામાન્ય વરસાદી પાણીના વહેણમાં જ પત્તાના મહેલની જેમ બેસી ગયો હતો અને રસ્તાની વચ્ચે મોટો ભૂવો પડી ગયો હતો.
