Botadમાં સાઈન બોર્ડ-સ્પીડ બ્રેકર લગાવવા કલેકટરની સૂચના, રોડ સેફ્ટીની યોજાઈ બેઠક

બોટાદ જિલ્લા કલેક્ટર ડો. જીન્સી રોયના અધ્યક્ષસ્થાને જિલ્લા માર્ગ સલામતી સમિતિની બેઠક યોજાઈ હતી. જેમાં કલેક્ટરે માર્ગ સલામતીની કામગીરીની સમીક્ષા કરતા વાહન ચાલકોની સલામતી માટે સંબંધિત અધિકારીઓને જરૂરી દિશાનિર્દેશ આપ્યા હતા.

વિભાગ કચેરીઓ દ્વારા થયેલી કામગીરીની પણ સમીક્ષા કરાઈ

બોટાદ જિલ્લા સેવા સદન કલેક્ટર કચેરી ખાતે યોજાયેલ આ બેઠકમાં કલેક્ટરે વાહન ચાલકોની સલામતી માટે બોટાદ જિલ્લાના વિવિધ રસ્તા પર આવશ્યકતા મુજબ જરુરી સૂચનાઓ સાથેના સાઈન બોર્ડ, સ્પીડ બ્રેકર, સ્પીડ લિમિટ દર્શાવતા બોર્ડ, રેડિયમ સહિતના સૂચન કર્યા હતા. રોડ સેફ્ટી સંદર્ભે વિવિધ વિભાગ કચેરીઓ દ્વારા થયેલી કામગીરીની પણ સમીક્ષા કરી માર્ગ સલામતી માટે જરુરી પગલાઓ લેવા માટે પરામર્શ કરવામાં આવ્યો હતો.

આરટીઓના અધિકારીઓ રહ્યાં હાજર

સહાયક પ્રાદેશિક વાહન વ્યવહાર અધિકારી ચાવડાએ માર્ગ સલામતી માટે વિવિધ કચેરીઓ દ્વારા થયેલી કામગીરીની સંકલિત વિગતો પ્રેઝન્ટેશનના માધ્યમથી રજૂ કરી હતી.આ બેઠકમાં બોટાદ જિલ્લા નિવાસી અધિક કલેક્ટર પી.એલ.ઝણકાત સહિત સંલગ્ન કચેરીઓના અધિકારીઓ અને કર્મચારીઓ ઉપસ્થિત રહ્યા હતા.