Gujarat: સુરતમાં મર્સિડિઝમાં આગ ચાંપી, ચાર લોકોએ અમદાવાદમાં ડીજેનું વાહન સળગાવ્યું

સુરતમાં વાહનોની ચોરી થયાના બનાવો પ્રકાશમાં આવવાની સાથે વાહનોમાં આગ ચાંપી દેવાના બનાવ પણ હવે સામે આવ્યા છે. શહેરના વેસુ વિસ્તારમાં અજાણ્યા શખ્સે મોડી રાત્રે મોંઘીઘાટ મર્સિડીઝ કાર પર જ્વલનશીલ પદાર્થ નાંખીને આગ ચાંપી દીધી હોવાની ઘટના બનતાં લોકોમાં ફફડાટ ફેલાયો છે. કાર પર જ્વલનશીલ પદાર્થ નાંખીને આગ ચાંપતો વ્યક્તિ સીસીટીવી કેમેરામાં કેદ થઈ ગયો છે.

સુરતમા મર્સિડિઝ કાર સળગાવી

પ્રાપ્ત વિગતો પ્રમાણે સુરતના વેસુ વિસ્તારમાં સ્થિત ગેલ કોલોની નિલકંઠ નિવાસમાં મોડી રાત્રે એક અજાણ્યો શખ્સ ઘૂસ્યો હતો. તેણે પાર્ક કરેલી મર્સિડિઝ કાર પર જ્વલનશીલ પદાર્થ છાંટ્યો હતો અને ત્યાર બાદ આગ ચાંપી દીધી હતી. મોંઘીદાટ કારમાં આગ લગાવતો આ શખ્સ સીસીટીવી કેમેરામાં કેદ થઈ ગયો હતો. ગાડીના માલિકે અજાણ્યા શખ્સ સામે પોલીસ સ્ટેશનમાં ફરિયાદ કરીને તેની કડક કાર્યવાહી કરવા માગ કરી હતી. કાર સળગી જતાં પરિવાર પણ ઘૃસકે ઘૃસકે રડી પડ્યો હતો.

અમદાવાદમાં ડીજેના વાહનમાં આગ લગાવી

બીજી તરફ અમદાવાદમાં પણ આ પ્રકારની ઘટના સામે આવી છે. શહેરના શાહપુર વિસ્તારમાં ચાર લોકોએ મોઢે રૂમાલ બાંધીને મોડી રાત્રે ડીજેના વાહનમાં આગ લગાડી દીધી હતી. અંગત અદાવતમાં આગ લગાવીને ચારેય આરોપીઓ ફરાર થઈ ગયા હતાં.શાહપુર પોલીસમાં ફરિયાદ થતાં પોલીસે વધુ તપાસ હાથ ધરી છે. ચોરીની ઘટનાઓ સાથે હવે વાહનોમાં આગ લગાવવાની ઘટનાઓ સામે આવતાં પોલીસના પેટ્રોલિંગ પર પણ સવાલો ઉભા થયાં છે.