રાજ્યના ગ્રામીણ વિસ્તારોનો સર્વાંગી વિકાસ કરી છેવાડાના માનવીને પાયાની સુવિધાઓ પૂરી પાડવા માટે ગુજરાત સરકારે વર્ષ 2026-27ના બજેટમાં પંચાયત અને ગ્રામ વિકાસ વિભાગ માટે રૂ. 14,858 કરોડની મોટી જોગવાઈ કરી છે. જેમાં ગ્રામીણ આવાસ, સ્વચ્છતા અને મહિલા સશક્તિકરણ પર વિશેષ ભાર મૂકવામાં આવ્યો છે.

ગ્રામીણ આવાસ: 1.60 લાખ નવા ઘરનું લક્ષ્ય

"દરેક પરિવારને પોતાનું પાકું ઘર" આપવાના સંકલ્પ સાથે સરકારે આવાસ યોજનામાં ગતિ વધારી છે:

PM આવાસ યોજના (ગ્રામીણ): આ યોજના હેઠળ કુલ રૂ. 1,755 કરોડની જોગવાઈ કરવામાં આવી છે.
ટોપ-અપ સહાય: રાજ્ય સરકારના ફાળામાંથી કેટેગરી-એ ના લાભાર્થીઓ માટે વધારાના રૂ. 90 કરોડ ફાળવાયા છે. આગામી વર્ષમાં 1.60 લાખ નવા આવાસ બનાવવાનું આયોજન છે.

સ્વચ્છતા અને વિકાસ: મુખ્યમંત્રી નિર્મળ ગ્રામ યોજના

ગામડાઓને ગંદકીમુક્ત બનાવવા માટે વિવિધ યોજનાઓને એકીકૃત કરીને રૂ. 650 કરોડના ખર્ચે 'મુખ્યમંત્રી નિર્મળ ગ્રામ યોજના' અમલી બનશે.
ગ્રે-વોટર ટ્રીટમેન્ટ: 400 ગામોના ગંદા પાણીને તળાવોમાં ભળતું અટકાવવા માટે રૂ. 50 કરોડ.
શૌચાલય સહાય: સામૂહિક શૌચાલય નિર્માણની સહાયમાં રૂ. 2 લાખનો વધારો કરવામાં આવ્યો છે.
અટલવાડી યોજના: ગ્રામ્ય કક્ષાએ મલ્ટીપર્પઝ સામાજિક માળખું ઊભું કરવા રૂ. 60 કરોડ.

લખપતિ દીદી અને મહિલા રોજગાર

ગ્રામીણ મહિલાઓને આર્થિક રીતે સદ્ધર બનાવવા માટે 'મિશન મંગલમ' હેઠળ વિશેષ જોગવાઈઓ કરાઈ છે:
લખપતિ દીદી: સ્વ-સહાય જૂથની બહેનોને વ્યાજ સહાય અને પ્રોત્સાહન માટે રૂ. 47 કરોડ.
ગ્રામ હાટ: બહેનો દ્વારા ઉત્પાદિત વસ્તુઓના વેચાણ માટે કાયમી સ્થળ પૂરૂ પાડવા રૂ. 20 કરોડના ખર્ચે 'ગ્રામ હાટ' સ્થાપવામાં આવશે.

રોજગારી અને આજીવિકા

ગ્રામીણ વિસ્તારોમાં રોજગારી વધારવા માટે VB-G RAM G (વિકસિત ભારત ગેરંટી ફોર રોજગાર એન્ડ આજીવિકા મિશન) અંતર્ગત રૂ. 1,500 કરોડનું વિશાળ આયોજન કરવામાં આવ્યું છે.