Kutch: ખાવડા સરહદે પાંચ ડ્રોન દેખાયા, ભુજમાં સ્વયંભૂ બ્લેક આઉટ

ઓપરેશન સિંદૂર હેઠળ કાર્યવાહી કર્યા બાદ પાકિસ્તાન તરફથી ભારતના શહેરો પર સતત ડ્રોન હુમલા કરવામાં આવી રહ્યાં છે. બંને દેશો વચ્ચે યુદ્ધ વિરામ હોવા છતાં પાકિસ્તાન દ્વારા તેની નાપાક હરકતો ચાલુ જ છે. કચ્છમાં ખાવડા સરહદ પાસે પાંચ ડ્રોન દેખાયા હોવાથી સુરક્ષા એજન્સીઓ સતર્ક થઈ ગઈ છે. તે ઉપરાંત ભુજમાં સ્વયંભૂ બ્લેક આઉટ કરવામાં આવ્યુ છે.

કચ્છમાં ખાવડા સરહદે પાંચ ડ્રોન દેખાયા

કચ્છમાં ખાવડા સરહદે પાંચ ડ્રોન દેખાયા છે. નલિયા, સુથરી અને જખૌમાં ડ્રોન જોવા મળ્યાં છે. પાકિસ્તાન દ્વારા મોકલવામાં આવેલા આ ડ્રોનના કારણે સુરક્ષા એજન્સીઓ સતર્ક થઈ ગઈ છે. ભુજ શહેરમાં સ્વયંભૂ બ્લેક આઉટ કરી દેવાયું છે. સમગ્ર શહેરમાં લાઈટો બંધ કરવામાં આવી છે.

ભાણવડમાં સતત બીજા દિવસે બ્લેક આઉટ

બીજી તરફ દ્વારકાના ભાણવડમાં સતત બીજા દિવસે બ્લેક આઉટ કરવામાં આવ્યુ છે. સાંજે 7 વાગ્યાથી સવારે 6 વાગ્યા સુધી બ્લેક આઉટ જાહેર કરાયું છે. પોલીસ દ્વારા સતત પેટ્રોલિંગ હાથ ધરવામાં આવ્યું છે. પાલિકા અને મામલતદાર કચેરીમાં અધિકારીઓ અને કર્મચારીઓ સ્ટેન્ડબાય છે.