Khel Mahakumbh 3.0માં લીંબડી ડી.એલ.એસ.એસ હોકી ટીમે ઝાલાવાડનું ગૌરવ વધાર્યું

સ્પોર્ટ્સ ઓથોરિટી ઓફ ગુજરાત, ગાંધીનગર આયોજિત ખેલ મહાકુંભ ૩.૦ રાજ્યકક્ષા હોકી ભાઈઓ (અંડર-૧૪) સ્પર્ધા તા. ૨૪/૦૪/૨૦૨૫ થી ૩૦/૦૪/૨૦૨૫ સુધી જે.બી.શાહ સ્કુલ મોડાસા ખાતે યોજાઈ હતી. આ સ્પર્ધામાં ખેલ મહાકુંભ અંતર્ગત ગુજરાત રાજયના ચાર ઝોનમાં પ્રથમ અને દ્વિતીય આવેલી ટીમોએ ભાગ લીધો હતો. જેમાં મોડાસા અને લીંબડી ડી.એલ.એસ.એસ શાળા વચ્ચે ફાઈનલ મેચ યોજાઈ હતી.

લીંબડી ડી.એલ.એસ.એસ હોકી ટીમે સમગ્ર રાજ્યમાં ઝાલાવાડનું ગૌરવ વધાર્યું

આ મેચમાં બંને ટીમ ૩-૩ ગોલ કર્યા હતાં. આથી મેચ ડ્રો થવાથી પેનલ્ટી શૂટ આઉટમાં ગોલ્ડન ગોલ કરી મોડાસાની ટીમ ૧-૦ થી વિજેતા થઇ ગોલ્ડ મેડલ મેળવ્યો હતો. જ્યારે લીંબડીની ટીમે સિલ્વર મેડલ પ્રાપ્ત કર્યો હતો. મોડાસા ખાતે આયોજિત ખેલ મહાકુંભ ૩.૦ રાજ્યકક્ષા હોકી ભાઈઓ (અન્ડર-૧૭) સ્પર્ધામાં લીંબડી ડી.એલ.એસ.એસ. શાળાએ બ્રોન્ઝ (તૃતીય સ્થાન) મેડલ પ્રાપ્ત કર્યો હતો. આમ ખેલ મહાકુંભ ૩.૦માં લીંબડી ડી.એલ.એસ.એસ. ટીમનું હોકી રમતમાં ખુબજ સારૂ પ્રદર્શન જોવા મળ્યું હતું. આ ખેલાડીઓને દિગ્વિજયસિંહ ગોહિલ અને સુમિત તિવારી દ્વારા પ્રશિક્ષણ પૂરું પાડવામાં આવે છે. આમ લીંબડી ડી.એલ.એસ.એસ હોકી ટીમે સમગ્ર રાજ્યમાં ઝાલાવાડનું ગૌરવ વધાર્યું છે.