દક્ષિણ ગુજરાતના સરહદી અને ડુંગરાળ ડાંગ જિલ્લા પર કુદરત ફરી એકવાર મન મૂકીને વરસી છે. ડાંગના વનરાજીથી ઘેરાયેલા વિસ્તારોમાં સવારથી જ કાળાડિબાંગ વાદળો ઘેરાયા હતા અને જોતજોતામાં ગાજવીજ સાથે વરસાદ શરૂ થઈ ગયો હતો. જિલ્લાના મુખ્ય વહીવટી મથક આહવા ઉપરાંત વઘઈ અને સુબીર તાલુકાઓમાં મુશળધાર વરસાદ વરસતાં માર્ગો પાણી-પાણી થઈ ગયા હતા.
સાપુતારા ખાતે વરસાદને પગલે અદભુત નજારો
ખાસ કરીને ગુજરાતના પ્રખ્યાત ટુરિસ્ટ સ્પોટ સાપુતારા ખાતે વરસાદને પગલે અદભુત નજારો સર્જાયો હતો. અહીં ધુમ્મસની ચાદર સાથે વરસી રહેલા હળવાથી ભારે વરસાદી ઝાપટાંનો આનંદ માણવા માટે પ્રવાસીઓ ઉમટી પડ્યા હતા. ડાંગની ગિરિમાળાઓ અને ઘાટ માર્ગો પરથી પસાર થવું હવે વાહનચાલકો માટે રોમાંચક બન્યું છે. સમગ્ર વન્ય સરહદ લીલીછમ ચાદર ઓઢીને ખીલી ઉઠી છે.