યાત્રાધામ અંબાજીના કાયાકલ્પ માટે આકાર પામી રહેલા અંબાજી શક્તિ કોરિડોર પ્રોજેક્ટને લઈને ગુજરાત હાઇકોર્ટ તરફથી ખૂબ જ મહત્વપૂર્ણ અને ઐતિહાસિક નિર્ણય આવ્યો છે. અંબાજી-ગબ્બર શક્તિ કોરિડોરના નિર્માણ સામે રજૂ કરવામાં આવેલી તમામ વિરોધ અરજીઓને ગુજરાત હાઇકોર્ટે ફગાવી દઈને પ્રોજેક્ટને આખરી લીલી ઝંડી આપી દીધી છે.
અંબાજી-ગબ્બર શક્તિ કોરિડોર પ્રોજેક્ટને HCની લીલી ઝંડી
સુનાવણી દરમિયાન હાઇકોર્ટે સ્પષ્ટ કર્યું હતું કે સંબંધિત જમીન સરકારી છે અને પ્રોજેક્ટ અંગે બનાસકાંઠા જિલ્લા કલેક્ટર દ્વારા લેવાયેલા નિર્ણયમાં કોઈ પણ પ્રકારનો હસ્તક્ષેપ કે દખલગીરી કરવાનો અદાલતે ઇનકાર કર્યો છે. હાઇકોર્ટના આ હુકમથી કોરિડોર પ્રોજેક્ટ સામેના તમામ કાનૂની અવરોધો દૂર થઈ ગયા છે.અદાલતે પોતાના મહત્વપૂર્ણ અવલોકનમાં નોંધ્યું હતું કે અંબાજી ધામે આવતા કરોડો શ્રદ્ધાળુઓ અને દર્શાનાર્થીઓની સુવિધા તેમજ વ્યાપક હિત માટે આ શક્તિ કોરિડોર પ્રોજેક્ટ અત્યંત જરૂરી અને સમયસરનો છે.