અમરેલી જિલ્લાના લીલીયા તાલુકામાંથી માનવતાને શર્મસાર કરી દેતી અને કાળજું કંપાવી મૂકે તેવી અત્યંત ક્રૂર અને સનસનાટીભરી હત્યાની ઘટના સામે આવી છે. લીલીયા નજીક આવેલા ગુંદરણ ગામની સીમમાં પાર્ક કરેલા એક પેસેન્જર તુફાન વાહનને બહારથી આગ ચાંપી દેવામાં આવી હતી. આ વાહનની અંદર નિરાંતે ઊંઘી રહેલા મધ્યપ્રદેશના બે નિર્દોષ શ્રમિક યુવકો જીવતા હોમાઈ ગયા હતા અને બંનેના ઘટનાસ્થળે જ ભડથું થઈ જતાં કમકમાટીભર્યા મોત નીપજ્યા હતા. એકસાથે બે પરપ્રાંતીય યુવકોને વાહનમાં સળગાવીને મોતને ઘાટ ઉતારી દેવાતાં સમગ્ર અમરેલી પંથકમાં ભારે અરેરાટી સાથે ચકચાર મચી ગઈ છે. ઘટનાની ગંભીરતાને ધ્યાને રાખીને DYSP સહિત પોલીસ અને ફોરેન્સિક સાયન્સ લેબોરેટરી (FSL) નો મોટો કાફલો ઘટનાસ્થળે દોડી ગયો છે.
ગાડીમાં ઊંઘી રહ્યા હતા ને કાળ ત્રાટક્યો
લીલીયા તાલુકાના ગુંદરણ ગામની સીમ વિસ્તારમાં એક પેસેન્જર તુફાન વાહન ઊભું હતું. આ વાહનની અંદર મધ્યપ્રદેશથી મજૂરીકામ અર્થે આવેલા શ્રમિકો રાત્રિના સમયે સૂતા હતા.અજાણ્યા હત્યારાઓએ અત્યંત સોચી-સમજીને ઘડેલા કાવતરા હેઠળ ગાડીને બહારથી આગ લગાવી દીધી હતી, જેનાથી અંદર સૂતેલા યુવકોને બહાર નીકળવાની તક પણ ન મળી અને તેઓ આગની લપેટમાં આવી ગયા હતા.આ અતિ ઘાતકી ઘટનામાં જીવ ગુમાવનારાઓમાં રવિ કમલેશભાઈ બધેલ (ઉંમર વર્ષ 16) અને નીતિન રામસીંગ પચાયા (ઉંમર વર્ષ 21) નો સમાવેશ થાય છે. બંને યુવકો મૂળ મધ્યપ્રદેશના વતની હતા અને અહીં રોજીરોટી માટે મજૂરી કરતા હતા. આગ એટલી ભીષણ હતી કે તુફાન વાહન સંપૂર્ણપણે બળીને લોખંડના માળખામાં ફેરવાઈ ગયું હતું અને બંને યુવકોના મૃતદેહ સંપૂર્ણ બળી ગયેલી હાલતમાં મળી આવ્યા હતા.