અમદાવાદ-મુંબઈને જોડતા વ્યસ્ત નેશનલ હાઈવે 48 પર અંકલેશ્વર નજીક આજે એક હૃદયદ્રાવક અકસ્માતની ઘટના સામે આવી છે. ભારે વાહનોની અનિયંત્રિત ગતિએ વધુ એક નિર્દોષ બાઈક સવારનો ભોગ લીધો છે, જે આ વખતે ભારત ભણવા આવેલો એક વિદેશી વિદ્યાર્થી છે. અંકલેશ્વર નજીક હાઈવે પરથી પસાર થઈ રહેલા એક બાઈક સવાર આફ્રિકન યુવાનને એક અજાણ્યા તોતિંગ ટ્રક ચાલકે બેફામ ગતિએ ટક્કર મારી હતી.
અંકલેશ્વર હાઈવે પર હૃદયદ્રાવક અકસ્માત
અકસ્માત એટલો ભયાનક હતો કે બાઈક પરથી પટકાતા જ આફ્રિકન યુવાનને શરીરે અને માથાના ભાગે ગંભીર ઈજાઓ પહોંચી હતી, જેના કારણે તેનું ઘટનાસ્થળે જ કમકમાટીભર્યું મોત નીપજ્યું હતું. અકસ્માત સર્જાયા બાદ હાઈવે પરથી પસાર થતા અન્ય વાહનચાલકો અને સ્થાનિક લોકોના મોટા ટોળા ઘટનાસ્થળે એકત્ર થઈ ગયા હતા. જો કે, અકસ્માત સર્જનાર અજાણ્યો ટ્રક ચાલક ભીડ જમા થાય તે પહેલા જ પોતાના વાહન સાથે તકનો લાભ ઉઠાવીને ફરાર થઈ ગયો હતો.