બનાસકાંઠા જિલ્લાના અમીરગઢ તાલુકામાંથી એક અત્યંત આઘાતજનક અને કરુણ ઘટના સામે આવી છે. અમીરગઢ તાલુકામાં આવેલા સરોત્રા રેલવે સ્ટેશન નજીકથી પસાર થઈ રહેલી એક રેલવે માલગાડી (ગુડ્સ ટ્રેન) ની સામે એક અજાણ્યા યુવકે અચાનક પડતું મૂકીને આપઘાત કરી લીધો છે. ટ્રેનની ગતિ ખૂબ જ ઝડપી હોવાને કારણે યુવકને બચવાની કોઈ તક મળી ન હતી. આ આત્મઘાતી પગલાંને પગલે રેલવે ટ્રેક અને આસપાસના વિસ્તારમાં ભારે અરેરાટી વ્યાપી ગઈ છે અને સ્થાનિક લોકો ઘટનાસ્થળે એકઠા થઈ ગયા હતા.
ટ્રેનના હૂકમાં ફસાતાં ઘટનાસ્થળે જ મોત
પ્રત્યક્ષદર્શીઓ અને રેલવે સૂત્રો પાસેથી મળતી માહિતી મુજબ ચાલુ માલગાડી આગળ યુવકે કૂદકો મારતાં જ તે ટ્રેનના આગળના ભાગમાં આવેલા લોખંડના હૂકમાં ખરાબ રીતે ફસાઈ ગયો હતો. ટ્રેન સાથે ઢસડાવાને કારણે અને ગંભીર ઇજાઓ થવાને લીધે યુવકનું ઘટનાસ્થળે જ કમકમાટીભર્યું મોત નીપજ્યું હતું. આ અકસ્માત એટલો ભયાનક હતો કે ટ્રેનના હૂકમાંથી મૃતદેહને બહાર કાઢવામાં ભારે જહેમત ઉઠાવવી પડી હતી. ઘટનાની જાણ થતાં જ રેલવે પોલીસ અને અમીરગઢ સ્થાનિક પોલીસનો કાફલો તાત્કાલિક ઘટનાસ્થળે દોડી આવ્યો હતો.
