ગુજરાત અને રાજસ્થાન સરહદને જોડતો અમીરગઢ નેશનલ હાઈવે પર છેલ્લા કેટલાક સમયથી વાહનચોરીની વધતી ફરિયાદોને પગલે જિલ્લા પોલીસ વડાની સૂચનાથી લોકલ ક્રાઇમ સ્ક્વોડ અને સ્થાનિક પોલીસ એલર્ટ મોડ પર હતી. આ દરમિયાન અમીરગઢ પોલીસ સ્ટેશનના ઇકબાલગઢ વિસ્તારમાં ફરજ બજાવતા પોલીસ જમાદારોને એક શંકાસ્પદ ગેંગ મૂવમેન્ટ કરી રહી હોવાની ખાનગી રાહે સચોટ બાતમી મળી હતી.
નાકાબંધી કરીને ઘેરો ઘાલવામાં આવ્યો
બાતમી મળતા જ ઈકબાલગઢ પોલીસની ટીમે હાઈવે અને આસપાસના ગ્રામ્ય માર્ગો પર વહેલી સવારથી જ કડક નાકાબંધી અને વ્હીકલ ચેકિંગ ઓપરેશન ગોઠવી દીધું હતું. બાતમી મુજબના ચોક્કસ વાહનો પસાર થતાં જ પોલીસે ફિલ્મી ઢબે ઘેરો ઘાલીને ૪ શંકાસ્પદ ઇસમોને અટકાવ્યા હતા. ગાડીઓની તલાશી લેતા તેમની પાસેથી વાહનોના કોઈ કાયદેસરના કાગળો મળ્યા નહોતા, વળી ગાડીઓમાંથી બિનકાયદેસર હથિયારો મળી આવતા પોલીસ સ્ટાફે તાત્કાલિક તમામ ૪ શખ્સોને કસ્ટડીમાં લઈ લીધા હતા.
