રાજ્યભરમાં નાની વયે કે અચાનક આવતા હાર્ટ એટેકના કિસ્સાઓ ચિંતાજનક રીતે વધી રહ્યા છે, ત્યારે બનાસકાંઠાના વડગામ તાલુકાના જલોત્રા ગામેથી એક અત્યંત કાળજું કંપાવી દે તેવી ઘટના સામે આવી છે. જલોત્રા ગ્રામ પંચાયતના સરપંચ પતિ મહેશભાઈ ચૌધરીને અચાનક છાતીમાં અસહ્ય દુખાવો ઉપડતાં પરિવારજનો દ્વારા તેમને તાત્કાલિક સારવાર અર્થે હોસ્પિટલ ખસેડવામાં આવ્યા હતા.
બે સગા ભાઈઓના અકાળે અવસાન
મહેશભાઈને હોસ્પિટલ લઈ જવાયા હોવાની જાણ થતાં જ તેમના સગા મોટાભાઈ ધીરુભાઈ ચૌધરી પણ ભારે ચિંતામાં મુકાઈ ગયા હતા. ભાઈની ચિંતા અને આઘાતમાં ને આઘાતમાં ધીરુભાઈને પણ અચાનક હાર્ટ એટેક આવ્યો હતો. તબીબોની ટીમે બંને ભાઈઓને બચાવવા માટે સતત પ્રયાસો કર્યા હતા, પરંતુ સારવાર દરમિયાન જ બંને સગા ભાઈઓએ એકપછી એક દમ તોડી દીધો હતો. એક જ ઘરમાંથી અને એક જ દિવસે બે સગા ભાઈઓના અકાળે અવસાન થતાં ચૌધરી પરિવાર પર આભ તૂટી પડ્યું હતું.