ઔદ્યોગિક નગરી અંકલેશ્વરના GIDC વિસ્તારમાંથી એક ચોંકાવનારા સમાચાર સામે આવ્યા છે. અહીં આવેલા જાણીતા S.A. મોટર્સની નજીક આવેલ DGVCLના વીજપોલમાં અચાનક આગ લાગવાની ઘટના બની હતી. ચાલુ વીજપોલમાંથી અચાનક જ્વાળાઓ નિકળવા લાગતા આસપાસના વિસ્તારમાં ભારે ગભરાટ અને અફરાતફરીનો માહોલ સર્જાઈ ગયો હતો.
શોર્ટ સર્કિટના કારણે આગ લાગ્યાનું પ્રાથમિક અનુમાન
પ્રાપ્ત માહિતી અનુસાર, વીજપોલમાં અચાનક જ શોર્ટ સર્કિટ થવાને કારણે આ આગ લાગી હોવાનું અનુમાન લગાવવામાં આવી રહ્યું છે. જીવંત વીજપ્રવાહ ચાલુ હોવાને કારણે વીજપોલ પર ભડકો થતાં રાહદારીઓ અને વાહનચાલકોમાં થોડીવાર માટે ડરનો માહોલ જોવા મળ્યો હતો. સદનસીબે આ અકસ્માતમાં કોઈ જાનહાનીના સમાચાર સાંપડ્યા નથી.
નોટિફાઈડ ફાયરની ટીમ દ્વારા તાત્કાલિક કામગીરી
ઘટનાની જાણ થતાં જ નોટિફાઈડ વિભાગની ફાયર ટીમ તાત્કાલિક ઘટના સ્થળે દોડી આવી હતી. ફાયર જવાનોએ ભારે જહેમત અને સૂઝબૂઝ દાખવીને ગણતરીની મિનિટોમાં જ વીજપોલમાં લાગેલી આગ પર સફળતાપૂર્વક કાબુ મેળવી લીધો હતો, જેના કારણે એક મોટો અનર્થ ટળી ગયો હતો.
વીજ પુરવઠો ખોરવાયો, તંત્ર દ્વારા તપાસ શરૂ
આગની આ ઘટનાને પગલે તાત્કાલિક ધોરણે વીજ પુરવઠો બંધ કરવામાં આવ્યો હતો. સ્થાનિક તંત્ર દ્વારા ક્ષતિગ્રસ્ત વીજપોલની મરામતની કામગીરી હાથ ધરવામાં આવી છે જેથી આસપાસના વિસ્તારમાં પૂર્વવત વીજળી ચાલુ કરી શકાય. તંત્ર દ્વારા આ પ્રકારની દુર્ઘટનાઓથી બચવા માટે સુરક્ષાના પગલાં વધુ કડક કરવામાં આવે તેવી માંગ ઉઠી છે
આ પણ વાંચો: Bharuchના અંકલેશ્વરમાં ડંપિંગ સાઈટ બની આગનો અડ્ડો: ભડકોદ્રા ગામે ફરી ભભૂકી ભીષણ આગ
