ભરૂચ નજીક દિલ્હી-મુંબઈ એક્સપ્રેસ હાઈવે પર દેરોલ પાસે વહેલી સવારે એક અત્યંત ગમખ્વાર માર્ગ અકસ્માત સર્જાયો છે. ધોરાજીથી સુરત લગ્ન પ્રસંગે જઈ રહેલા જાનૈયાઓ ભરેલી લક્ઝરી બસ અને ટેન્કર વચ્ચે જોરદાર ટક્કર થતાં લગ્નની ખુશીઓ માતમમાં ફેરવાઈ ગઈ છે. આ ભયાનક અકસ્માતમાં બે મુસાફરોના કરુણ મોત નીપજ્યા છે, જ્યારે બાળકો સહિત 30થી વધુ મુસાફરો ઈજાગ્રસ્ત થયા છે.

દેરોલ નજીક લક્ઝરી બસ અને ટેન્કર વચ્ચે જોરદાર ટક્કર 

મળતી વિગતો અનુસાર, ધોરાજીથી જાનૈયાઓને લઈને એક ખાનગી લક્ઝરી બસ સુરત તરફ જઈ રહી હતી. દરમિયાન, વહેલી સવારે દિલ્હી-મુંબઈ એક્સપ્રેસ હાઈવે પર ભરૂચના દેરોલ નજીક લક્ઝરી બસ અને એક ટેન્કર વચ્ચે જોરદાર ટક્કર થઈ હતી. અકસ્માત એટલો ગંભીર હતો કે બસના આગળના ભાગને ભારે નુકસાન પહોંચ્યું હતું અને વહેલી સવારની નિંદ્રામાં રહેલા મુસાફરોમાં ભારે ચીસાચીસ અને અફરાતફરી મચી ગઈ હતી.

બે મુસાફરોના મોત, બાળકો સહિત 30થી વધુ ઈજાગ્રસ્ત

આ ગમખ્વાર અકસ્માતમાં ગંભીર ઈજાઓને કારણે બે મુસાફરોના મોત નીપજ્યા છે, જ્યારે બસમાં સવાર બાળકો સહિત 30થી વધુ લોકોને નાની-મોટી ઈજાઓ પહોંચી છે. ઘટનાની જાણ થતાં જ સ્થાનિક પોલીસ, હાઈવે પેટ્રોલિંગ ટીમ અને 108 એમ્બ્યુલન્સનો કાફલો તાત્કાલિક ઘટનાસ્થળે દોડી ગયો હતો અને બચાવ કામગીરી હાથ ધરી તમામ ઈજાગ્રસ્તોને તાત્કાલિક સારવાર અર્થે સિવિલ હોસ્પિટલ ખાતે ખસેડવામાં આવ્યા છે. હાલ પોલીસે અકસ્માત અંગે ગુનો નોંધી વધુ તપાસ હાથ ધરી છે.

આ પણ વાંચો: Rajkot: માર્કેટિંગ યાર્ડમાં સતત બીજા દિવસે 2 લાખ મણ મગફળી ઠલવાઈ; 1,400 વાહનો સાથે મધરાત્રિથી ખેડૂતોની લાંબી કતારો લાગી