ભરૂચ જિલ્લામાંથી પસાર થતાં રાષ્ટ્રીય ધોરીમાર્ગ પર આવેલા પાલેજ હાઈવે ઓવરબ્રિજ નજીક સર્વિસ રોડની હાલત અત્યંત જર્જરિત અને જોખમી બની ગઈ છે. ચોમાસાના વરસાદ બાદ સર્વિસ રોડ પર ઠેર-ઠેર વિશાળકાય ખાડા પડી ગયા છે, જેમાં વરસાદી પાણી ભરાયેલા રહેતા હોવાથી વાહનચાલકોને ખાડાની ઊંડાઈનો અંદાજ આવતો નથી.
સર્વિસ રોડની હાલત અત્યંત જર્જરિત
આજે આવા જ એક પાણી ભરેલા ઊંડા ખાડાના કારણે મોટી દુર્ઘટના ઘટે તેવો અકસ્માત સર્જાયો હતો. પાલેજ સર્વિસ રોડ પરથી પસાર થઈ રહેલી એક પેસેન્જર રિક્ષા અચાનક પાણી ભરેલા ખાડામાં ખાબકી હતી અને સંતુલન ગુમાવતાં રિક્ષા રોડ પર જ પલટી મારી ગઈ હતી. રિક્ષા પલટતાં જ આસપાસના સ્થાનિક લોકો અને અન્ય વાહનચાલકો મદદ માટે દોડી આવ્યા હતા.