ભરૂચના આમોદ પંથકમાંથી પસાર થતા દિલ્હી-મુંબઈ એક્સપ્રેસ હાઈવે પર આજે વહેલી સવારે એક ગંભીર અકસ્માત સર્જાયો હતો.માતર ગામ નજીક સર્જાયેલા આ ટ્રિપલ અકસ્માતમાં મુસાફરોથી ભરેલી ટ્રાવેલ્સ બસના ડ્રાઈવર કેબિનમાં ફસાઈ ગયા હતા.જોકે કરજણ ફાયર વિભાગની સમયસૂચકતા અને કામગીરીના કારણે ડ્રાઈવરનો આબાદ બચાવ થયો હતો. માતર ટોલ પ્લાઝાથી લગભગ બે કિલોમીટર વડોદરા તરફ આ ગમખ્વાર અકસ્માત થયો હતો.
ટ્રાવેલ્સ બસનો આગળનો ભાગ ક્ષતિગ્રસ્ત થઈ ગયો
રાજસ્થાનના બાડમેરથી સુરત તરફ મુસાફરોને લઈને જઈ રહેલી એક પેસેન્જર ટ્રાવેલ્સ બસ એક લાંબુ ટ્રેલર અને એક ફોર વ્હીલર ગાડી આ ત્રિપલ અકસ્માત સર્જાયો હતો.ટક્કર એટલી જોરદાર હતી કે ટ્રાવેલ્સ બસનો આગળનો ભાગ ક્ષતિગ્રસ્ત થઈ ગયો હતો. ટક્કરને કારણે ટ્રાવેલ્સ બસના ડ્રાઈવર આગળની કેબિનમાં જ ગંભીર રીતે ફસાઈ ગયા હતા.વાહનના પતરા અંદરની તરફ ધસી જવાને કારણે ડ્રાઈવર બહાર નીકળી શકે તેવી સ્થિતિમાં નહોતા.ઘટનાને પગલે હાઈવે પર અને આસપાસના વિસ્તારમાં થોડીવાર માટે દોડધામ મચી ગઈ હતી અને વાહનવ્યવહાર પણ પ્રભાવિત થયો હતો.