સૌરાષ્ટ્રના દરિયાકાંઠાના વિસ્તારોનો ઉપયોગ કરીને વન્યજીવોના અંગો અને પ્રતિબંધિત પદાર્થોની તસ્કરી કરતા માફિયાઓ પર ભાવનગર વન વિભાગ અને સ્ટેટ મોનિટરિંગ સેલે શિકંજો કસ્યો છે. ભાવનગર શહેરમાં કિંમતી એમ્બરગ્રીસ (જેને સામાન્ય ભાષામાં વ્હેલ માછલીની ઊલટી અથવા તરતું સોનું કહેવામાં આવે છે) નો મોટો જથ્થો વેચવા માટે કેટલાક ઇસમો આવી રહ્યા હોવાની સચોટ બાતમી સ્ટેટ મોનિટરિંગ સેલ (SMC) ને મળી હતી. આ બાતમીના આધારે SMC ની ટીમે વોચ ગોઠવીને પ્રથમ ઓપરેશનમાં ૪ શખ્સોને રંગેહાથ ઝડપી લીધા હતા. તેમની પાસેથી અંદાજે 4.20 કરોડની કિંમતનું એમ્બરગ્રીસ મળી આવ્યું હતું.
તપાસ ફોરેસ્ટ વિભાગને સોંપાતા બીજો મોટો બ્લાસ્ટ
એમ્બરગ્રીસ એ વન્યજીવ સંરક્ષણ ધારા હેઠળ પ્રતિબંધિત પદાર્થ હોવાથી SMC દ્વારા આ કેસની આગળની કાયદેસરની તપાસ અને કસ્ટડી ભાવનગર વન વિભાગ ને સોંપવામાં આવી હતી. વન વિભાગના ઉચ્ચ અધિકારીઓએ પકડાયેલા ચારેય આરોપીઓની કડક પૂછપરછ હાથ ધરતા આ રેકેટના અન્ય છેડા પણ ખુલ્યા હતા. તસ્કરોની મોડસ ઓપરેન્ડી સમજીને વન વિભાગની ટીમે તાત્કાલિક ભાવનગરના ગ્રામ્ય વિસ્તાર એવા ખડસલિયા ગામની સીમમાં દરોડો પાડ્યો હતો. આ સર્ચ ઓપરેશન દરમિયાન વન વિભાગને બીજી મોટી સફળતા મળી હતી અને સીમમાંથી વધુ 4 શખ્સોને 5.10 કરોડના એમ્બરગ્રીસના જથ્થા સાથે દબોચી લેવાયા હતા.