કચ્છ જિલ્લાના ભુજ-ખાવડા નેશનલ હાઈવે પર કાળજું કંપાવી દે તેવો એક અત્યંત ભયાનક માર્ગ અકસ્માત સર્જાયો છે. હાઈવે પર પૂરપાટ ઝડપે દોડતા ટ્રેલર અને એક કાર વચ્ચે સર્જાયેલી ગમખ્વાર ટક્કરમાં ઉત્તરાખંડથી કચ્છ ફરવા આવેલા એક જ પરિવારના 3 બાળકો સહિત કુલ 7 લોકોના કમકમાટીભર્યા મોત નિપજ્યા છે. અકસ્માત એટલો ભયાવહ હતો કે કારના બે કટકા થઈને સંપૂર્ણ કચ્ચરઘાણ વળી ગયો હતો અને રસ્તા પર મૃતદેહો વેરવિખેર થઈ ગયા હતા.

ધોરડોથી પરત ફરતી વખતે ઉત્તરાખંડના પરિવારને નડ્યો ગોઝારો અકસ્માત

મળતી વિગતો અનુસાર, ઉત્તરાખંડનો એક પરિવાર કચ્છના પ્રવાસે આવ્યો હતો. આ પરિવાર સફેદ રણ ધોરડોની મુલાકાત લઈને કાર મારફતે પરત ફરી રહ્યો હતો, તે દરમિયાન ભુજ-ખાવડા નેશનલ હાઈવે પર સામેથી આવતા તોતિંગ ટ્રેલર સાથે કારની ધડાકાભેર ટક્કર થઈ હતી. આ ભીષણ અકસ્માતમાં કારમાં સવાર ત્રણ માસૂમ બાળકો સહિત પરિવારના સાતેય સભ્યો ગંભીર રીતે કચડાઈ જતાં ઘટનાસ્થળે જ મોતને ભેટ્યા હતા.

કારનો કચ્ચરઘાણ નીકળી ગયો, હાઈવે પર હૃદયદ્રાવક દ્રશ્યો સર્જાયા

ટક્કરની તીવ્રતા એટલી જોરદાર હતી કે કાર પડીકું વળીને બે ભાગમાં વહેંચાઈ ગઈ હતી અને હાઈવે પર મૃતદેહો વેરવિખેર હાલતમાં પડ્યા હોવાના અત્યંત હૃદયદ્રાવક દ્રશ્યો સર્જાયા હતા. અકસ્માતની જાણ થતાં જ આસપાસના લોકો અને પોલીસ કાફલો તાત્કાલિક ઘટનાસ્થળે દોડી આવ્યો હતો. પ્રવાસની ખુશીઓ માતમમાં ફેરવાઈ જતાં સમગ્ર પંથકમાં ભારે શોક અને અરેરાટી વ્યાપી ગઈ છે. પોલીસે અકસ્માત અંગે ગુનો નોંધી મૃતદેહોને પોસ્ટમોર્ટમ અર્થે ખસેડી આગળની કાયદેસરની કાર્યવાહી હાથ ધરી છે.

આ પણ વાંચો: Ahmedabad: રાજ્યમાં ગુલાબી ઠંડીનો અહેસાસ, નલિયા અને અમરેલી 11 ડિગ્રી સાથે સૌથી ઠંડા શહેર બન્યા