કચ્છ જિલ્લાના ભુજ તાલુકાના નારાણપર ગામે તહેવારના પવિત્ર દિવસો દરમિયાન કાળમુખા અકસ્માત બાદ ભારેલા અગ્નિ જેવી અતિ તંગદિલીભરી પરિસ્થિતિ સર્જાઈ છે. નારાણપર બેંક નજીક એક બેફામ દોડતી કાર અને બે મોટરસાઇકલ વચ્ચે ગમખ્વાર ત્રિપલ અકસ્માત સર્જાયો હતો. આ કાળજું ધ્રૂજાવી દેતી દુર્ઘટનામાં બાઈક સવાર બે આશાસ્પદ યુવકોના કમકમાટીભર્યા મોત નીપજતાં સમગ્ર પંથકમાં અરેરાટી સાથે ભારે આક્રોશ ફેલાયો હતો. તહેવારના દિવસે જ પરિવારના આધારસ્તંભ સમાન બે જુવાનજોધ દીકરાઓના કરૂણ મોતથી સમાજ અને પરિવારોમાં રોષનો દાવાનળ ભભૂકી ઊઠ્યો હતો. અકસ્માત બાદ ઘટનાસ્થળે એકઠા થયેલા સેંકડો લોકોના ટોળાએ બેકાબૂ બનીને ભારે તોડફોડ મચાવી હતી અને અકસ્માત સર્જનારી કારને આગ ચાંપી દેતાં વાતાવરણ અત્યંત તણાવપૂર્ણ બની ગયું હતું.
કાર-બાઈક વચ્ચે જોરદાર ટક્કરમાં 2 યુવકોના મોત
નારાણપર ગામે બેંક પાસેના માર્ગ પર પૂરપાટ ઝડપે આવી રહેલી કાર અને સામેથી આવતા બે અલગ-અલગ બાઈક વચ્ચે પ્રચંડ ટક્કર થઈ હતી. ટક્કર એટલી ભયાનક હતી કે બાઈકના ફુરચેફુરચા ઊડી ગયા હતા. અકસ્માતમાં ગંભીર રીતે ઘવાયેલા બંને યુવાનો લોહીલુહાણ હાલતમાં રસ્તા પર પટકાયા હતા અને તેમણે ઘટનાસ્થળે જ દમ તોડી દીધો હતો.અકસ્માતની જાણ થતાં જ આસપાસના વિસ્તારો અને ગામમાંથી મોટી સંખ્યામાં લોકો ઘટનાસ્થળે દોડી આવ્યા હતા. તહેવારના ટાણે જ બનેલી આ ઘટનાથી લોકોનો ગુસ્સો સાતમા આસમાને પહોંચ્યો હતો. રોષે ભરાયેલા લોકોએ કારમાં તોડફોડ કરી તેને આગને હવાલે કરી દીધી હતી. ધૂ-ધૂ બળતી કાર અને તોડફોડના દ્રશ્યોથી નારાણપર ગામમાં અફરાતફરી મચી ગઈ હતી.