બોરસદ-ડભાસી માર્ગ પરથી પસાર થઈ રહેલા બે બાઈક સવારો માટે એક સ્વિફ્ટ કાર કાળ બનીને ત્રાટકી હતી. લાઇફલાઇન હોસ્પિટલ નજીકથી જ્યારે બન્ને મોટરસાયકલ ચાલકો પોતાના નિયત માર્ગે પસાર થઈ રહ્યા હતા, ત્યારે પાછળથી પૂર ઝડપે અને કોઈ પણ જાતના નિયંત્રણ વગર આવતી એક સ્વિફ્ટ કારના ચાલકે બન્ને બાઈકને પાછળથી જોરદાર ટક્કર મારી દીધી હતી.
બાળકી સહિત ત્રણ લોકો રસ્તા પર પટકાયા
કારની સ્પીડ એટલી વધારે હતી કે ટક્કર વાગતાની સાથે જ બન્ને બાઈક પર સવાર નાગરિકો હવામાં ફંગોળાઈને દૂર રોડ પર પટકાયા હતા. આ ગંભીર દુર્ઘટનામાં બાઈક પર સવાર એક નાની માસૂમ બાળકી સહિત કુલ ત્રણ લોકોને નાની-મોટી અને ગુપ્ત ઇજાઓ પહોંચી હતી. અકસ્માતને પગલે રોડ પર ચીસાચીસ થતાં આસપાસના દુકાનદારો અને રાહદારીઓ તાત્કાલિક મદદ માટે દોડી આવ્યા હતા.