બોટાદના નાગરિકો માટે એક અત્યંત આનંદના સમાચાર સામે આવ્યા છે. લાંબા સમયથી ચાલી રહેલી માગ અને રજૂઆતોને અંતે આખરે બોટાદમાં નવી સિવિલ હોસ્પિટલ અને મેડિકલ કોલેજની સ્થાપનાને મંજૂરી મળી ગઈ છે. સ્થાનિક ધારાસભ્ય ઉમેશ મકવાણા દ્વારા કરવામાં આવેલી સક્રિય રજૂઆતો આખરે સફળ સાબિત થઈ છે, જેનાથી સમગ્ર જિલ્લામાં ખુશીની લહેર છવાઈ ગઈ છે.
80000 ચો.મી. જમીન પર ભવ્ય પ્રોજેક્ટનું નિર્માણ
આ નવા પ્રોજેક્ટ માટે વહીવટી તંત્ર દ્વારા યોગ્ય જગ્યાની ફાળવણી કરવામાં આવી છે. બોટાદના મિલિટરી રોડ પર આવેલી 80000 ચોરસ મીટર વિશાળ જમીન પર આ સિવિલ હોસ્પિટલ અને મેડિકલ કોલેજનું નિર્માણ કાર્ય હાથ ધરવામાં આવશે. આ ભવ્ય સંકુલ બનવાથી બોટાદના આરોગ્ય માળખાને એક નવું બળ મળશે, અને અત્યાધુનિક સુવિધાઓ ઉપલબ્ધ થશે.
મોરબીની સંસ્થા સંભાળશે પ્રોજેક્ટની મહત્વની જવાબદારી
આ મોટા પ્રોજેક્ટને સમયસર અને ગુણવત્તાસભર રીતે પૂર્ણ કરવા માટે જવાબદારી સોંપવામાં આવી છે. મોરબીની જાણીતી "ડેલ્ટા મિલેનિયમ મેડિકેર પ્રા.લિ." સંસ્થા દ્વારા આ સિવિલ હોસ્પિટલ અને મેડિકલ કોલેજના નિર્માણ તથા પ્રોજેક્ટ સંબંધી તમામ કામગીરી સંભાળવામાં આવશે. સંસ્થાના આગમનથી કામગીરીમાં ઝડપ આવશે તેવી આશા વ્યક્ત કરવામાં આવી રહી છે.
ગંભીર બિમારીઓની સારવાર માટે બહાર નહીં જવું પડે
અગાઉ બોટાદ અને આસપાસના ગ્રામ્ય વિસ્તારોના દર્દીઓને ગંભીર બીમારીઓની સારવાર અર્થે ભાવનગર, રાજકોટ કે અમદાવાદ સુધી લાંબા થવું પડતું હતું, જેમાં સમય અને નાણાં બંનેનો વ્યય થતો હતો. હવે બોટાદમાં જ આ હોસ્પિટલ શરૂ થવાથી સ્થાનિક સ્તરે જ શ્રેષ્ઠ અને ગંભીર રોગોની સારવાર મળી રહેશે, જેનાથી સામાન્ય જનતાને મોટી રાહત મળશે.
મેડિકલ શિક્ષણ ક્ષેત્રે નવી તકો અને રોજગારીનું સર્જન
આ માત્ર એક હોસ્પિટલ નહીં, પરંતુ મેડિકલ કોલેજ પણ હોવાથી બોટાદના વિદ્યાર્થીઓ માટે મેડિકલ ક્ષેત્રે ઉચ્ચ અભ્યાસની નવી તકો ઘરઆંગણે જ ઊભી થશે. સ્થાનિક યુવાનોને ડોક્ટર બનવાનું સપનું પૂરું કરવાની ઉત્તમ તક મળશે તેમજ પ્રદેશમાં રોજગારીની નવી તકો પણ ખુલશે. ધારાસભ્ય ઉમેશ મકવાણાએ મીડિયા સમક્ષ આ તમામ મહત્વની માહિતી શેર કરી હતી અને બોટાદની જનતાને અભિનંદન પાઠવ્યા હતા.
આ પણ વાંચો: Botad-તરઘરા રોડ પર કાર-બાઇકના વચ્ચે સર્જાયો ગંભીર અકસ્માત, ઉત્તર પ્રદેશના 2 યુવકો થયા ઈજાગ્રસ્ત
