બોટાદ જિલ્લાના ગઢડા તાલુકામાં ચોમાસાના પ્રારંભિક તબક્કામાં જ પાણીની મોટી સમસ્યા હલ થઈ ગઈ છે. ગઢડાના ગ્રામીણ વિસ્તારના મુખ્ય જળસ્ત્રોત સમાન કાળુભાર નદીમાં પાણીની પ્રચંડ આવક થઈ છે. ભૌગોલિક સ્થિતિ અનુસાર, અમરેલી જિલ્લાના ઉપરવાસના વિસ્તારોમાં વિતેલા દિવસોમાં પડેલા ભારે વરસાદનું પાણી વહીને બોટાદ જિલ્લા તરફ આવે છે. આ જ કારણે, અમરેલીમાં થયેલી અમીવર્ષાને લીધે ગઢડા તાલુકાના પાટણા ગામે આવેલી કાળુભાર નદીમાં પૂરના નવા નીર ધસમસતા વહેતા થયા છે.
સીઝનના પહેલા વરસાદમાં નદી બે કાંઠે
https://www.instagram.com/reel/DafAeoME5w_/?utm_source=ig_web_button_share_sheet
કાળુભાર નદી ચાલુ સીઝનના પહેલા જ વરસાદમાં બંને કાંઠે વહેતી થતાં પાટણા સહિત આસપાસના ડઝન જેટલા ગામોના ખેડૂતોમાં ભારે આનંદનો માહોલ જોવા મળી રહ્યો છે. આ વિસ્તારના ખેડૂતો મુખ્યત્વે કપાસ, મગફળી અને તલ જેવા રોકડિયા પાકોના વાવેતર પર આધાર રાખે છે. નદીમાં પાણી આવવાના કારણે આસપાસના સીમ વિસ્તારોના બોર અને કુવાઓમાં જળસ્તર તુરંત ઊંચા આવશે, જેથી જો ચોમાસા દરમિયાન વરસાદ ખેંચાય તો પણ ખેડૂતો નદીના પાણીથી કટોકટીના સમયે પાકને બચાવી શકશે.
નદીમાં નવા નીરની આવકના સુંદર દ્રશ્યો જોવા માટે પાટણા અને આજુબાજુના ગામના લોકો નદી કિનારે ઉમટી પડ્યા છે. જેને પગલે બોટાદ જિલ્લા ડિઝાસ્ટર મેનેજમેન્ટ અને સ્થાનિક તંત્ર દ્વારા સાવચેતીના પગલાં લેવામાં આવ્યા છે. નદીના વહેણને જોતા નીચાણવાળા કોઝવે કે નદીના પટમાં પશુઓને ન લઈ જવા તેમજ કોઈએ પણ સેલ્ફી લેવાના ચક્કરમાં નદીના ઊંડા પ્રવાહ તરફ ન જવા માટે ગ્રામ પંચાયત અને વહીવટી તંત્ર દ્વારા તાકીદ કરવામાં આવી છે.